Atharva Veda · Chapter 3.24

payasvatīroṣadhayaḥ payasvan māmakaṃ vacaḥ /
atho payasvatīnāmā bhare'haṃ sahasraśaḥ

vedāhaṃ payasvantaṃ cakāra dhānyaṃ bahu /
saṃbhṛtvā nāma yo devastaṃ vayaṃ havāmahe yoyo ayajvano gṛhe

imā yāḥ pañca pradiśo mānavīḥ pañca kṛṣṭayaḥ /
vṛṣṭe śāpaṃ nadīriveha sphātiṃ samāvahān

udutsaṃ śatadhāraṃ sahasradhāramakṣitam /
evāsmākedaṃ dhānyaṃ sahasradhāramakṣitam

śatahasta samāhara sahasrahasta saṃ kira /
kṛtasya kāryasya ceha sphātiṃ samāvaha

tisro mātrā gandharvāṇāṃ catasro gṛhapatnyāḥ /
tāsāṃ yā sphātimattamā tayā tvābhi mṛśāmasi

upohaśca samūhaśca kṣattārau te prajāpate /
tāvihā vahatāṃ sphātiṃ bahuṃ bhūmānamakṣitam