Atharva Veda · Chapter 20.96

tīvrasyābhivayaso asya pāhi sarvarathā vi harī iha muñca /
indra mā tvā yajamānāso anye ni rīraman tubhyamime sutāsaḥ

tubhyaṃ sutāstubhyamu sotvāsastvāṃ giraḥ śvātryā ā hvayanti /
indredamadya savanaṃ juṣāṇo viśvasya vidvāmiha pāhi somam

ya uśatā manasā somamasmai sarvahṛdā devakāmaḥ sunoti /
na gā indrastasya parā dadāti praśastamiccārumasmai kṛṇoti

anuspaṣṭo bhavatyeṣo asya yo asmai revān na sunoti somam /
niraratnau maghavā taṃ dadhāti brahmadviṣo hantyanānudiṣṭaḥ

aśvāyanto gavyanto vājayanto havāmahe tvopagantavā u /
ābhūṣantaste sumatau navāyāṃ vayamindra tvā śunaṃ huvema

muñcāmi tvā haviṣā jīvanāya kamajñātayakṣmāduta rājayakṣmāt/
grāhirjagrāha yadyetadtasyā indrāgnī pra mumuktamenam

yadi kṣitāyuryadi vā pareto yadi mṛtyorantikaṃ nīta eva /
tamā harāmi nirṛterupasthādaspārśamenaṃ śataśāradāya

sahasrākṣeṇa śatavīryeṇa śatāyuṣā haviṣāhārṣamenam /
indro yathainaṃ śarado nayātyati viśvasya duritasya pāram

śataṃ jīva śarado vardhamānaḥ śataṃ hemantān chatamu vasantān /
śataṃ ta indro agniḥ savitā bṛhaspatiḥ śatāyuṣā haviṣāhārṣamenam

āhārṣamavidaṃ tvā punarāgāḥ punarṇavaḥ /
sarvāṅga sarvaṃ te cakṣuḥ sarvamāyuśca te'vidam

brahmaṇāgniḥ saṃvidāno rakṣohā bādhatāmitaḥ /
amīvā yaste garbhaṃ durṇāmā yonimāśaye

yaste garbhamamīvā durṇāmā yonimāśaye /
agniṣṭaṃ brahmaṇā saha niṣkravyādamanīnaśat

yaste hanti patayantaṃ niṣatsnuṃ yaḥ sarīsṛpam /
jātaṃ yaste jighāṃsati tamito nāśayāmasi

yasta ūrū viharatyantarā dampatī śaye /
yoniṃ yo antarārelhi tamito nāśayāmasi

yastvā bhrātā patirbhūtvā jāro bhūtvā nipadyate /
prajāṃ yaste jighāṃsati tamito nāśayāmasi

yastvā svapnena tamasā mohayitvā nipadyate /
prajāṃ yaste jighāṃsati tamito nāśayāmasi

akṣībhyāṃ te nāsikābhyāṃ karṇābhyāṃ chubukādadhi /
yakṣmaṃ śīrṣaṇyaṃ mastiṣkājjihvāyā vi vṛhāmi te

grīvābhyasta uṣṇihābhyaḥ kīkasābhyo anūkyāt/
yakṣmaṃ doṣaṇyamaṃsābhyāṃ bāhubhyāṃ vi vṛhāmi te

hṛdayātte pari klomno halīkṣṇātpārśvābhyām /
yakṣmaṃ matasnābhyāṃ plīhno yaknaste vi vṛhāmasi

āntrebhyaste gudābhyo vaniṣṭhorudarādadhi /
yakṣmaṃ kukṣibhyāṃ plāśernābhyā vi vṛhāmi te

ūrubhyāṃ te aṣṭhīvadbhyāṃ pārṣṇibhyāṃ prapadābhyām /
yakṣmaṃ bhasadyaṃ śroṇibhyāṃ bhāsadaṃ bhāṃsaso vi vṛhāmi te

amehanādvanaṃkaraṇāllomabhyaste nakhebhyaḥ /
yakṣmaṃ sarvasmādātmanastamidaṃ vi vṛhāmi te

asthibhyaste majjabhyaḥ snāvabhyo dhamanibhyaḥ /
yakṣmaṃ pāṇibhyāmaṅgulibhyo nakhebhyo vi vṛhāmi te

aṅgeaṅge lomnilomni yaste parvaṇiparvaṇi /
yakṣmaṃ tvacasyaṃ te vayaṃ kaśyapasya vībarheṇa viṣvañcaṃ vi vṛhāmasi

apehi manasaspate'pa kāma paraścara /
paro nirṛtyā ā cakṣva bahudhā jīvato manaḥ