Atharva Veda · Chapter 20.16

udapruto na vayo rakṣamāṇā vāvadato abhriyasyeva ghoṣāḥ /
giribhrajo normayo madanto bṛhaspatimabhyarkā anāvan

saṃ gobhiraṅgiraso nakṣamāṇo bhaga ivedaryamaṇaṃ nināya /
jane mitro na dampatī anakti bṛhaspate vājayāśūṃrivājau

sādhvaryā atithinīriṣirā spārhāḥ suvarṇā anavadyarūpāḥ /
bṛhaspatiḥ parvatebhyo vitūryā nirgā ūpe yavamiva sthivibhyaḥ

āpruṣāyan madhunā ṛtasya yonimavakṣipann arka ulkāmiva dyoḥ /
bṛhaspatiruddharann aśmano gā bhūmyā udneva vi tvacaṃ bibheda

apa jyotiṣā tamo antarikṣadudnaḥ śīpālamiva vāta ājat/
bṛhaspatiranumṛśyā valasyābhramiva vāta ā cakra ā gāḥ

yadā valasya pīyato jasuṃ bhedbṛhaspatiragnitapobhirarkaiḥ /
dadbhirna jihvā pariviṣṭamādadāvirnidhīṃrakṛṇodusriyāṇām

bṛhaspatiramata hi tyadāsāṃ nāma svarīṇāṃ sadane guhā yat/
āṇḍeva bhitvā śakunasya garbhamudusriyāḥ parvatasya tmanājat

aśnāpinaddhaṃ madhu paryapaśyan matsyaṃ na dīna udani kṣiyantam /
niṣṭajjabhāra camasaṃ na vṛkṣādbṛhaspatirviraveṇā vikṛtya

soṣāmavindatsa svaḥ so agniṃ so arkeṇa vi babādhe tamāṃsi /
bṛhaspatirgovapuṣo valasya nirmajjānaṃ na parvaṇo jabhāra

himeva parṇā muṣitā vanāni bṛhaspatinākṛpayadvalo gāḥ /
anānukṛtyamapunaścakāra yātsūryāmāsā mitha uccarātaḥ

abhi śyāvaṃ na kṛśanebhiraśvaṃ nakṣatrebhiḥ pitaro dyāmapiṃśan /
rātryāṃ tamo adadhurjyotirahan bṛhaspatirbhinadadriṃ vidadgāḥ

idamakarma namo abhriyāya yaḥ pūrvīranvānonavīti /
bṛhaspatiḥ sa hi gobhiḥ so aśvaiḥ sa vīrebhiḥ sa nṛbhirno vayo dhāt