Atharva Veda · Chapter 20.13

udu brahmāṇyairata śravasyendraṃ samarye mahayā vasiṣṭha /
ā yo viśvāni śavasā tatānopaśrotā ma īvato vacāṃsi

ayāmi ghoṣa indra devajāmirirajyanta yacchurudho vivāci /
nahi svamāyuścikite janeṣu tānīdaṃhāṃsyati parṣyasmān

yuje rathaṃ gaveṣaṇaṃ haribhyāmupa brahmāṇi jujuṣāṇamasthuḥ /
vi bādhiṣṭa sya rodasī mahitvendro vṛtrāṇyapratī jaghanvān

āpaścitpipyu staryo na gāvo nakṣann ṛtaṃ jaritārasta indra /
yāhi vāyurna niyuto no achā tvaṃ hi dhībhirdayase vi vājān

te tvā madā indra mādayantu śuṣmiṇaṃ tuvirādhasaṃ jaritre /
eko devatrā dayase hi martān asmin chūra savane mādayasva

evedindraṃ vṛṣaṇaṃ vajrabāhuṃ vasiṣṭhāso abhyarcantyarkaiḥ /
sa na stuto vīravaddhātu gomadyūyaṃ pāta svastibhiḥ sadā naḥ

ṛjīṣī vajrī vṛṣabhasturāṣāṭchuṣmī rājā vṛtrahā somapāvā /
yuktvā haribhyāmupa yāsadarvāṅmādhyaṃdine savane matsadindraḥ