Scripture Library
Atharva Veda · Chapter 1.13
1.13.1
namaste astu vidyute namaste stanayitnave /
namaste astvaśmane yenā dūḍāśe asyasi
1.13.2
namaste pravato napādyatastapaḥ samūhasi /
mṛḍayā nastanūbhyo mayastokebhyaskṛdhi
1.13.3
pravato napān nama evāstu tubhyaṃ namaste hetaye tapuṣe ca kṛṇmaḥ /
vidma te dhāma paramaṃ guhā yatsamudre antarnihitāsi nābhiḥ
1.13.4
yāṃ tvā devā asṛjanta viśva iṣuṃ kṛṇvānā asanāya dhṛṣṇum /
sā no mṛḍa vidathe gṛṇānā tasyai te namo astu devi
Original text: atharvavedaḥ · Sanskrit Wikisource contributors · Sanskrit Wikisource · CC BY-SA 4.0