aṣṭādaśaśaktipīṭhastotram · Chapter 1

// aṣṭādaśaśaktipīṭhastotram //
laṅkāyāṃ śāṅkarī devī kāmākṣī kāñcikāpure /
pradyumne śṛṅkhalādevī cāmuṇḍī krauñcapaṭṭaṇe //
alampure jogulāmbā śrīśaile bhramarāmbikā /
kolhāpure mahālakṣmī māhūrye ekavīrikā //
ujjayinyāṃ mahākālī pīṭhikyāṃ puruhūtikā /
oḍhyāyāṃ girijādevī māṇikyā dakṣavāṭake //
harikṣetre kāmarūpā prayāge mādhaveśvarī /
jvālāyāṃ vaiṣṇavī devī gayā māṅgalyagaurikā //
vāraṇasyāṃ viśālākṣī kāśmīreṣu sarasvatī /
aṣṭādaśa supīṭhāni yogināmapi durlabham //
sāyaṅkāle paṭhennityaṃ sarvaśatruvināśanam /
sarvarogaharaṃ divyaṃ sarvasampatkaraṃ śubham //
iti aṣṭādaśaśaktipīṭhastutiḥ /