anātmaśrīvigarhaṇaprakaraṇam · Chapter 1

//śrīḥ//
//anātmaśrīvigarhaṇaprakaraṇam//
labdhā vidyā rājamānyā tataḥ kiṃ
prāptā saṃpatprābhavāḍha¬ā tataḥ kim/
bhuktā nārī sundarāṅgī tataḥ kiṃ
yena svātmā naiva sākṣātkṛto'bhūt

keyūrādyairbhūṣito vā tataḥ kiṃ
kauśeyādyairāvṛto vā tataḥ kim/
tṛpto mṛṣṭānnādinā vā tataḥ kiṃ
yena svātmā naiva sākṣātkṛto'bhūt

dṛṣṭā nānā cārudeśāstataḥ kiṃ
puṣṭāśceṣṭā bandhuvargāstataḥ kim/
naṣṭaṃ dāridra¬ādiduḥkhaṃ tataḥ kiṃ
yena svātmā naiva sākṣātkṛto'bhūt

snātastīrthe jahnujādau tataḥ kiṃ
dānaṃ dattaṃ dvyaṣṭasaṃkhyaṃ tataḥ kim/
japtā mantrāḥ koṭiśo vā tataḥ kiṃ
yena svātmā naiva sākṣātkṛto'bhūt

gotraṃ samyagbhūṣitaṃ vā tataḥ kiṃ
gātraṃ bhasmācchāditaṃ vā tataḥ kim/
rudrākṣādiḥ saddhṛto vā tataḥ kiṃ
yena svātmā naiva sākṣātkṛto'bhūt

annairviprāstarpitā vā tataḥ kiṃ
yajñairdevāstoṣitā vā tataḥ kim/
kītryā vyāptāḥ sarvalokāstataḥ kiṃ
yena svātmā naiva sākṣātkṛto'bhūt

kāyaḥ kliṣṭaścopavāsaistataḥ kiṃ
labdhāḥ putrāḥ svīyapatnyāstataḥ kim/
prāṇāyāmaḥ sādhito vā tataḥ kiṃ
yena svātmā naiva sākṣātkṛto'bhūt

yuddhe śatrurnirjito vā tataḥ kiṃ
bhūyo mitraiḥ pūrito vā tataḥ kim/
yogaiḥ prāptāḥ siddhayo vā tataḥ kiṃ
yena svātmā naiva sākṣātkṛto'bhūt

abdhiḥ padbhyāṃ laṅghito vā tataḥ kiṃ
vāyuḥ kumbhe sthāpito vā tataḥ kim/
meruḥ pāṇāvuddhṛto vā tataḥ kiṃ
yena svātmā naiva sākṣātkṛto'bhūt

kṣvelaḥ pīto dugdhavadvā tataḥ kiṃ
vahnirjagdho lājavadvā tataḥ kim/
prāptaścāraḥ pakṣivatkhe tataḥ kiṃ
yena svātmā naiva sākṣātkṛto'bhūt

baddhāḥ samyakpāvakādyāstataḥ kiṃ
sākṣādviddhā lohavaryāstataḥ kim/
labdho nikṣepo'ñjanādyaistataḥ kiṃ
yena svātmā naiva sākṣātkṛto'bhūt

bhūpendratvaṃ prāptamuvryāṃ tataḥ kiṃ
devendratvaṃ saṃbhṛtaṃ vā tataḥ kim/
muṇḍīndratvaṃ copalabdhaṃ tataḥ kiṃ
yena svātmā naiva sākṣātkṛto'bhūt

mantraiḥ sarvaḥ stambhito vā tataḥ kiṃ
bāṇairlakṣyo bhedito vā tataḥ kim/
kālajñānaṃ cāpi labdhaṃ tataḥ kiṃ
yena svātmā naiva sākṣātkṛto'bhūt

kāmātaṅkaḥ khaṇḍito vā tataḥ kiṃ
kopāveśaḥ kuṇṭhito vā tataḥ kim/
lobhāśleṣo varjito vā tataḥ kiṃ
yena svātmā naiva sākṣātkṛto'bhūt

mohadhvāntaḥ peṣito vā tataḥ kiṃ
jāto bhūmau nirmado vā tataḥ kim/
mātsaryārtirmīlitā vā tataḥ kiṃ
yena svātmā naiva sākṣātkṛto'bhūt

dhāturlokaḥ sādhito vā tataḥ kiṃ
viṣṇorloko vīkṣito vā tataḥ kim/
śaṃbhorlokaḥ śāsito vā tataḥ kiṃ
yena svātmā naiva sākṣātkṛto'bhūt

yasyedaṃ hmadaye samyaganātmaśrīvigarhaṇam/
sadodeti sa evātmasākṣātkārasya bhājanam

anye tu māyikajagadbhrāntivyāmohamohitāḥ/
na teṣāṃ jāyate kvāpi svātmasākṣātkṛtirbhuvi

iti śrīmatparamahaṃsaparivrājakācāryasya
śrīgovindabhagavatpūjyapādaśiṣyasya
śrīmacchaṃkarabhagavataḥ kṛtau
anātmaśrīvigarhaṇaprakaraṇaṃ
saṃpūrṇam//
//anātmaśrīvigarhaṇaprakaraṇam//