akṣamālikopaniṣat · Chapter 1

akṣamālikopaniṣat
akārādikṣakārāntavarṇajātakalevaram /
vikalevarakaivalyaṃ rāmacandrapadaṃ bhaje //
ॐ vāṅme manasi pratiṣṭhitā mano me vāci pratiṣṭhitamāvirāvīrma edhi //
vedasya ma āṇīsthaḥ śrutaṃ me mā prahāsīranenādhītenārātrānsandadhāmyṛtaṃ vadiṣyāmi satyaṃ vadiṣyāmi //
tanmāmavatu tadvaktāramavatu avatu māmavatu vaktāramavatu vaktāram //
ॐ śāntiḥ śāntiḥ śāntiḥ //
hariḥ ॐ /
atha prajāpatirguhaṃ papraccha bho brahmannakṣamālābhedavidhiṃ brūhīti /
sā kiṃ lakṣaṇā kati bhedā asyāḥ kati sūtrāṇi kathaṃ ghaṭanāprakāraḥ ke varṇāḥ kā pratiṣṭhā kaiṣādhidevatā kiṃ phalaṃ ceti /
taṃ guhaḥ pratyuvāca pravālamauktikasphaṭikaśaṅkharajatāṣṭāpadacandanaputrajīvikābje rudrākṣā iti /
ādikṣāntamūrtiḥ sāvadhānabhāvā /
sauvarṇaṃ rājataṃ tāmraṃ tanmukhe mukhaṃ tatpucche pucchaṃ tadantarāvartanakrameṇa yojayet /
yadasyāntaraṃ sūtraṃ tadbrahma /
yaddakṣapārśve tacchaivam /
yadvāme tadvaiṣṇavam /
yanmukhaṃ sā sarasvatī /
yatpucchaṃ sā gāyatrī /
yatsuṣiraṃ sā vidyā /
yā granthiḥ sā prakṛtiḥ /
ye svarāste dhavalāḥ /
ye sparśāste pītāḥ /
ye parāste raktāḥ /
atha tāṃ pañcabhirgandhairamṛtaiḥ pañcabhirgavyaistanubhiḥ śodhayitvā pañcabhirgavyairgandhodakena saṃsnāpya tasmātsoṅkāreṇa patrakūrcena snapayitvā
ṣṭabhirgandhairālipya sumanaḥsthale niveśyākṣatapuṣpairārādhya pratyakṣamādikṣāntairvarṇairbhāvayet /
omaṅkāra mṛtyuñjaya sarvavyāpaka prathame'kṣe pratitiṣṭha /
omāṅkārākarṣaṇātmakasarvagata dvitīye'kṣe pratitiṣṭha /
omiṅkārapuṣṭidākṣobhakara tṛtīye'kṣe pratitiṣṭha /
omīṅkāra vākprasādakara nirmala caturthe'kṣe pratitiṣṭha /
omuṅkāra sarvabalaprada sāratara pañcame'kṣe pratitiṣṭha /
omūṅkāroccāṭana duḥsaha ṣaṣṭhe'kṣe pratitiṣṭha /
omṛṅkākāra saṃkṣobhakara cañcala saptame'kṣe pratitiṣṭha /
omṝṅkāra saṃmohanakarojavalāṣṭame'kṣe pratitiṣṭha /
omlṛṅkāravidveṣaṇakara mohaka navame'kṣe pratitiṣṭha /
omlṝṅkāra mohakara daśame'kṣe pratitiṣṭha /
omeṅkāra sarvavaśyakara śuddhasattvaikādaśe'kṣe pratitiṣṭha /
omaiṅkāra śuddhasāttvika puruṣavaśyakara dvādaśe'kṣe pratitiṣṭha /
omoṅkārākhilavāṅmaya nityaśuddha trayodaśe'kṣe pratitiṣṭha /
omauṅkāra sarvavāṅmaya vaśyakara caturdaśe'kṣe pratitiṣṭha /
omaṅkāra gajādivaśyakara mohana pañcadaśe'kṣe pratitiṣṭha /
omaḥkāra mṛtyunāśanakara raudra ṣoḍaśe'kṣe pratitiṣṭha /
ॐ kaṅkāra sarvaviṣahara kalyāṇada saptadaśe'kṣe pratitiṣṭha /
ॐ khaṅkāra sarvakṣobhakara vyāpakāṣṭādaśe'kṣe pratitiṣṭha /
ॐ gaṅkāra sarvavighnaśamana mahattaraikonaviṃśe'kṣe pratitiṣṭha /
ॐ ghaṅkāra saubhāgyada stambhanakara viṃśe'kṣe pratitiṣṭha /
ॐ ṅakāra sarvaviṣanāśakarograikaviṃśe'kṣe pratitiṣṭha /
ॐ caṅkārābhicāraghna krūra dvāviṃśe'kṣe pratitiṣṭha /
ॐ chaṅkāra bhūtanāśakara bhīṣaṇa trayoviṃśe'kṣe pratitiṣṭha /
ॐ jaṅkāra kṛtyādināśakara durdharṣa caturviṃśe'kṣe pratitiṣṭha /
ॐ jhaṅkāra bhūtanāśakara pañcaviṃśe'kṣe pratitiṣṭha /
ॐ ñakāra mṛtyupramathana ṣaḍviṃśe'kṣe pratitiṣṭha /
ॐ ṭaṅkāra sarvavyādhihara subhaga saptaviṃśe'kṣe pratitiṣṭha /
ॐ ṭhaṅkāra candrarūpāṣṭāviṃśe'kṣe pratitiṣṭha /
ॐ ḍaṅkāra garuḍātmaka viṣaghna śobhanaikonatriṃśe'kṣe pratitiṣṭha /
ॐ ḍhaṅkāra sarvasaṃpatprada subhaga triṃśe'kṣe pratitiṣṭha /
ॐ ṇaṅkāra sarvasiddhiprada mohakaraikatriṃśe'kṣe pratitiṣṭha /
ॐ taṅkāra dhanadhānyādisaṃpatprada prasanna dvātriṃśe'kṣe pratitiṣṭha /
ॐ thaṅkāra dharmaprāptikara nirmala trayastriṃśe'kṣe pratitiṣṭha /
ॐ daṅkāra puṣṭivṛddhikara priyadarśana catustriṃśe'kṣe pratitiṣṭha /
ॐ dhaṅkāra viṣajvaranighna vipula pañcatriṃśe'kṣe pratitiṣṭha /
ॐ naṅkāra bhuktimuktiprada śānta ṣaṭtriṃśe'kṣe pratitiṣṭha /
ॐ paṅkāra viṣavighnanāśana bhavya saptatriṃśe'kṣe pratitiṣṭha /
ॐ phaṅkārāṇimādisiddhiprada jyotīrūpāṣṭatriṃśe'kṣe pratitiṣṭha /
ॐ baṅkāra sarvadoṣahara śobhanaikonacatvāriṃśe'kṣe pratitiṣṭha /
ॐ bhaṅkāra bhūtapraśāntikara bhayānaka catvāriṃśe'kṣe pratitiṣṭha /
ॐ maṅkāra vidveṣimohanakaraikacatvāriṃśe'kṣe pratitiṣṭha /
ॐ yaṅkāra sarvavyāpaka pāvana dvicatvāriṃśe'kṣe pratitiṣṭha /
ॐ raṅkāra dāhakara vikṛta tricatvāriṃśe'kṣe pratitiṣṭha /
ॐ laṅkāra viśvaṃbhara bhāsura catuścatvāriṃśe'kṣe pratitiṣṭha /
ॐ vaṅkāra sarvāpyāyanakara nirmala pañcacatvāriṃśe'kṣe pratitiṣṭha /
ॐ śaṅkāra sarvaphalaprada pavitra ṣaṭcatvāriṃśe'kṣe pratitiṣṭha /
ॐ ṣaṅkāra dharmārthakāmada dhavala saptacatvāriṃśe'kṣe pratitiṣṭha /
ॐ saṅkāra sarvakāraṇa sārvavarṇikāṣṭacatvāriṃśe'kṣe pratitiṣṭha /
ॐ haṅkāra sarvavāṅmaya nirmalaikonapañcāśadakṣe pratitiṣṭha /
ॐ ḻaṅkāra sarvaśaktiprada pradhāna pañcāśadakṣe pratitiṣṭha /
ॐ kṣaṅkāra parāparatattvajñāpaka paraṃjyotīrūpa śikhāmaṇau pratitiṣṭha /
athovāca ye devāḥ pṛthivīpadastebhyo namo bhagavanto'numadantu śobhāyai pitaro'numadantu śobhāyai jñānamayīmakṣamālikām /
athovāca ye devā antarikṣasadastebhyaḥ
ॐ namo bhagavanto'numadantu śobhāyai pitaro'numadantu śobhāyaijñānamayīmakṣamālikām /
athovāca ye devā diviṣadastebhyo namo bhagavanto'numadantu śobhāyai pitaro'numadantu śobhāyai jñānamayīmakṣamālikām /
athovāca ye mantrā yā vidyāstebhyo namastābhyaśconnamastacchaktirasyāḥ pratiṣṭhāpayati /
athovāca ye brahmaviṣṇurudrāstebhyaḥ saguṇebhya ॐ namastadvīryamasyāḥ pratiṣṭhāpayati /
athovāca ye sāṅkhyāditattvabhedāstebhyo namo vartadhvaṃ virodhe'nuvartadhvam /
athovāca ye śaivā vaiṣṇavāḥ śāktāḥ śatasahasraśastebhyo namonamo bhagavanto'numadantvanugṛhṇantu /
athovāca yāśca mṛtyoḥ prāṇavatyastābhyo namonamastenaitaṃ mṛḍayata mṛḍayata /
punaretasyāṃ sarvātmakatvaṃ bhāvayitvā bhāvena pūrvamālikāmutpādyārabhya tanmayīṃ mahopahārairupahṛtya ādikṣāntairakṣarairakṣamālāmaṣṭottaraśataṃ spṛśet /
atha punarutthāpya pradakṣiṇīkṛtyoṃ namaste bhagavati mantramātṛke'kṣamāle sarvavaśaṅkaryoṃnamaste bhagavati mantramātṛke'kṣamālike śeṣastambhinyoṃ namaste bhagavati mantramātṛke'kṣamāle uccāṭanyoṃnamaste bhagavati mantramātṛke'kṣamāle viśvāmṛtyo mṛtyuñjayasvarūpiṇi sakalalokoddīpini sakalalokarakṣādhike sakalalokojjīvike sakalalokotpādike divāpravartike rātripravartike nadyantaraṃ yāsi deśāntaraṃ yāsi dvīpāntaraṃ yāsi lokāntaraṃ yāsi sarvadā sphurasi sarvahṛdi vāsasi / namaste parārūpe namaste paśyantīrūpe namaste madhyamārūpe namaste vaikharīrūpe sarvatattvātmike sarvavidyātmike sarvaśaktyātmike sarvadevātmike vasiṣṭhena muninārādhite viśvāmitreṇa muninopajīvyamāne namaste namaste /
prātaradhīyāno rātrikṛtaṃ pāpaṃ nāśayati /
sāyamadhīyāno divasakṛtaṃ pāpaṃ nāśayati /
tatsāyaṃprātaḥ prayuñjānaḥ pāpo'pāpobhavati /
evamakṣamālikayā japto mantraḥ sadyaḥ siddhikaro
bhavatītyāha bhagavānguhaḥ prajāpatimityupaniṣat //
ॐ vāṅ me manasi pratiṣṭhitā mano me vāci pratiṣṭhitamāvirāvīrma edhi //
vedasya ma āṇīsthaḥ śrutaṃ me mā prahāsīranenādhītenāhorātrānsandadhāmyṛtaṃ vadiṣyāmi satyaṃ vadiṣyāmi /
tanmāmavatu tadvaktāramavatu avatu māmavatu vaktāramavatu vaktāram //
ॐ śāntiḥ śāntiḥ śāntiḥ //
hariḥ ॐ tatsat //
ityakṣamālikopaniṣatsamāptā //

adhikādhyayanāya
class="wikitable" "align=left; border: 1px solid gray;"