स्कन्द पुराण · अध्याय 5.12

सनत्कुमार उवाच॥
उत्तरे तु प्रवक्ष्यामि मर्कटेश्वरमुत्तमम्॥
तत्र तीर्थं च विख्यातं सर्वकामप्रदायकम्

तस्मिंस्तीर्थे नरः स्नात्वा गोशतस्य फलं लभेत्॥
विस्फोटानां प्रशांत्यर्थं बालानां चैव कारणे

मापेन मापितान्कृत्वा मसूरांस्तत्र कुट्टयेत् ॥
शीतलायाः प्रभावेन बालाः संतु निरामयाः

ये पश्यंति नरा भक्त्या शीतलां दुरितापहाम् ॥
न तेषां दुष्कृतं किंचिन्न दारिद्र्यं द्विजोत्तम

न च रोगभयं तेषां ग्रहपीडा तथैव च

इति श्रीस्कांदे महापुराण एकाशीतिसाहस्र्यां संहितायां आवंत्यखण्डेऽवन्तीक्षेत्रमाहात्म्ये शीतला माहात्म्यवर्णनंनाम द्वादशोऽध्यायः