रत्नगुणसंचयगाथा · अध्याय 8

रूपस्य शुद्धि फलशुद्धित वेदितव्या फलरूपशुद्धित सर्वज्ञतशुद्धिमाहुः
सर्वज्ञताय फलशुद्धित रूपशुद्धी आकाशधातुसमताय अभिन्नछिन्नाः ॥

त्रैधातुकं समतिक्रान्त न बोधिसत्त्वा क्लेशापनीत उपपत्ति निदर्शयन्ति
जरव्याधिमृत्युविगताश्च्युति दर्शयन्ति प्रज्ञाय पारमित यत्र चरन्ति धीराः ॥

नामेव रूपि जगती अयु पङ्कसक्ता संसारचक्रि भ्रमते ऽनिलचक्रतुल्ये
जानित्व भ्रान्तु जगती मृगवागुरेव आकाश पक्षिसदृशा विचरन्ति प्रज्ञाः ॥

रूपस्मि यो न चरते परिशुद्धचारी विज्ञान संज्ञ अपि वेदन चेतनायाम्
एवं चरन्तु परिवर्जयि सर्वसङ्गां सङ्गाद्विमुच्य चरते सुगतान प्रज्ञाम् ॥