पैप्पलाद-संहिता · अध्याय 4.5

यां त्वा गन्धर्वो अखनद्
वरुणाय मृतभ्रजे ।
तां त्वा वयं खनामस्य्
ओषधिं शेपहर्षणीम् ॥

वृषणस् ते खनितारो
वृषा त्वम् अस्य् ओषधे ।
वृषासि वृष्ण्यावती
वृषणे त्वा खनामसि ॥

उद् उषा उद् उ सूर्य
उच् छुष्मा ओषधीनाम् ।
उद् एजति प्रजापतिर्
वृषा शुष्मेण वाजिना ॥

ऊर्ध्वश्राणम् इदं कृधि
यथा स्म ते विरोहतो
अभितप्तम् इवानति ।
ततस् ते शुष्मवत्तरम्
इयं कृणोत्व् ओषधिः ॥

अपां रस ओषधीनाम्
अथो वनस्पतीनाम् ।
अथो सोमस्य भ्रातास्य्
आर्श्यम् असि वृष्ण्यम् ॥

अश्वस्य ऋश्यस्य
बस्तस्य पुरुषस्य च ।
य ऋषभस्य वाजस्
तम् अस्मै धेह्य् ओषधे ॥

सं वाजा ऋषभाणां
सं शुष्मा ओषधीनाम् ।
सं पुंसाम् इन्द्र वृष्ण्यम्
अस्मै धेहि तनूबलम् ॥

अद्याग्ने अद्य सवितर्
अद्य देवि सरस्वति ।
अद्या मे ब्रह्मणस्पते
धनुर् इवा तानया पसः ॥

ऊर्ध्वास् तिष्ठन्ति गिरय
ऊर्ध्वा वाता उद् ईरते ।
ऊर्ध्वो ऽयं मामको
मयूख इवाधि भूम्याम् ॥

उत् तिष्ठोग्र वि धूनुष्व
वि ते श्वयन्तु नाड्यः ।
अतन्द्रो अश्वपा इव
नाव ग्लायो ऽधि मुष्कयोः ॥