पैप्पलाद-संहिता · अध्याय 3.9
अम्बाः सुमुखाः सृजत
पद्वत् सृजत सत्यज्ञेयम् ।
सृजाम्य् अहं दूतान्
अस्मै विषाय हन्तवे ।
वार् उग्रम् अरसं विषम्
आहेयम् अरसं विषं निर्विषम् ॥
इन्द्रम् अहम् इह हुवे
सोमपाम् उभयाविनम्
अस्मै विषाय हन्तवे ।
वार् उग्रम् अरसं विषम्
आहेयम् अरसं विषं निर्विषम् ॥
वरुणम् अहम् इह हुव
उग्रं राजन्यैः सह-
-अस्मै विषाय हन्तवे ।
वार् उग्रम् अरसं विषम्
आहेयम् अरसं विषं निर्विषम् ॥
अदितिम् अहम् इह हुवे
सूरपुत्रां कनीनिकाम्
अस्मै विषाय हन्तवे ।
वार् उग्रम् अरसं विषम्
आहेयम् अरसं विषं निर्विषम् ॥
बृहस्पतिम् अहम् इह हुवे
यो देवानां पुरोहितो
ऽस्मै विषाय हन्तवे ।
वार् उग्रम् अरसं विषम्
आहेयम् अरसं विषं निर्विषम् ॥
आणाश्चाणाश् चण्डामर्का
अस्मै विषाय हन्तवे ।
वार् उग्रम् अरसं विषम्
आहेयम् अरसं विषं निर्विषम् ॥
नवानां नवतीनां
विषस्य रोपुषीणाम् ।
सर्वासाम् अग्रभं नाम
वीतापेतारसं विषम् ॥
मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0