ग्रंथ पाठ

पैप्पलाद-संहिता · अध्याय 1.8

1.8.1

अमुष्माद् अधि पर्वताद्
अवत्कम् असि भेषजम् ।
भेषजं सुभेषजं
यत् ते कृणोमि भेषजम् ॥

1.8.2

आद् अङ्गा कुविद् अङ्गा
शतं यद् भेषजानि ते
सहस्रं वा घ यानि ते ।
तेषाम् असि त्वम् उत्तमम्
अनास्रावम् अरोगणम् ॥

1.8.3

अरुस्यानम् इदं महत्
पृथिव्या अध्य् उद्भृतम् ।
तद् आस्रावस्य भेषजं
तद् उ रोगम् अनीनशत् ॥

1.8.4

उपजीका उद् भरन्ति
समुद्राद् अधि भेषजम् ।
अरुस्यानम् अस्य् आथर्वणं
रोगस्थानम् अस्य् आथर्वणम् ॥

मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0