ग्रंथ पाठ

पैप्पलाद-संहिता · अध्याय 1.69

1.69.1

जायमानो निर् अरुजत्
सपत्नान् दोधतो ऽभयान् ।
स वै सपत्नानां सभा
अवालप्स्यो अनाशयत् ॥

1.69.2

आराद् अरातिं कृणुते
अशस्तिम् अप बाधते ।
अवालप्स्यः स यो मणिः
सहस्वान् अभिमातिहा ॥

1.69.3

चक्षुर् अस्य सूत्रम् आसीत्
तर्द्म श्रोत्रम् उताभरत् ।
अवालप्स्यः स यो मणिः
सहस्वान् अभिमातिहा ॥

1.69.4

इमं मणिम् आवालप्स्यं
यस्मिन्न् आरोहयामसि ।
स वै सपत्नान् आ दत्ते
स एनं पातु विश्वतः
स एनं जरसे नयात् ॥

मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0