बोधसार · अध्याय 16.3

[प्. 330-]
अथ प्रातःस्मरणम् ।
प्रातः स्मरन्ति मुनयो देवस्य सवितुर्महः ।
वरेण्यं तद्धियः साक्षि तदेवास्मीति संततम्

अन्वयव्यतिरेकाभ्यां जाग्रत्स्वप्नसुषुप्तिषु ।
यदेकं केवलं ज्ञानं तदेवाहमहं हि तत्

ज्ञानाज्ञाने तद्विषयौ तदहङ्कार एव च ।
प्रकाश्यन्ते येन भूम्ना तदहं ह्यहमेव तत्

विश्वश्च तैजसः प्राज्ञो नास्म्यहं सत्स्वरूपतः ।
यतस्ते तु प्रकाश्यन्ते तदहं नास्मि चेतरत्

ज्ञानाज्ञानप्रपञ्चेऽस्मिञ्ज्ञानाज्ञानेन नाशिते ।
यत्सच्छिष्टं परं ब्रह्म ह्यहं तन्नेतरत्स्मरेत्