યોગયાત્રા · અધ્યાય 19

કૃત્વૈવં ગ્રહપૂજામ્ ઋચા તતશ્ ચાગ્નિલિઙ્ગયા જુહુયાત્।
શ્લોકાંશ્ ચાસ્મિન્ન્ અર્થે કાશ્યપમુનિચોદિતાન્ વક્ષ્યે॥

તતો ઽપ્રતિરથં કૃત્સ્નં યાત્રાલિઙ્ગં ચ યદ્ ભવેત્।
આયુષ્યમ્ અભયં ચૈવ સર્વં ચૈવાપરાજિતમ્॥

શર્મવર્મગણં ચૈવ તથા સ્વસ્ત્યયનં ગણમ્।
એતાન્ પઞ્ચગણાન્ હુત્વા સંસ્થાપ્યાગ્નિં યથાવિધિ॥

ભૂત ભૂતેતિ ચ ગણં યત્તે ચન્દ્રસ્ તથૈવ ચ।
ઐન્દ્રો ગણસ્ તથા ચાન્દ્રો મન્ત્રાશીઃસૂક્તમ્ એવ ચ॥

ભૂયો ભૂયસ્ તથા જ્વાલાં સંસ્પૃશ્યાથ પુરોહિતઃ।
સ્પૃશેચ્ ચ નૃપતિં મન્ત્રૈર્ ઉચ્ચૈર્ બ્રૂયાત્ પુનઃ પુનઃ॥

ચક્ષુર્દઃ પ્રાણદશ્ ચાપિ વર્ચોદશ્ ચ ભવ પ્રભો।
અનાધૃષ્યતમશ્ ચાસિ યથા ત્વં હવ્યવાહન॥

શાત્રવાણાં તથા રાજાપ્ય્ અનાધૃષ્યો ભવત્ય્ અયમ્।
હૂયમાને નિમિત્તાનિ વક્ષ્યામ્ય્ અહમ્ અતઃ પરમ્॥

કમ્પોત્કાસવિજૃમ્ભણપ્રચલનસ્વેદાશ્રુપાતક્ષુધો-
દ્ગારાદ્યં ચ પુરોધસઃ સ્મૃતિવિપચ્ ચાનિષ્ટમ્ અન્યચ્ છુભમ્।
આજ્યં કેશપિપીલિકામલયુતં સત્ત્વાવલીઢં ચ યત્
તન્ નેષ્ટં શુભમ્ અન્યથોપકરણં દ્રવ્યાણ્ય્ અનૂનાનિ ચ॥

ઉત્થાય સ્વયમ્ ઉજ્જ્વલાર્ચિર્ અનલઃ સ્વાહાવસાને હવિર્
ભુક્તે દેહસુખઃ પ્રદક્ષિણગતિઃ સ્નિગ્ધો મહાન્ સંહતઃ।
નિર્ધૂમઃ સુરભિઃ સ્ફુલિઙ્ગરહિતો યાત્રાનુલોમો મૃદુર્
મુક્તેન્દીવરકાઞ્ચનદ્યુતિધરો યાતુર્ જયં શંસતિ॥

ઇષ્ટદ્રવ્યઘટાતપત્રતુરગશ્રીવૃક્ષશૈલાકૃતિર્
ભેર્યબ્દોદધિદુન્દુભીભશકટસ્નિગ્ધસ્વનઃ પૂજિતઃ।
નેષ્ટઃ પ્રોક્તવિપર્યયો હુતવહઃ સ્નિગ્ધો ઽન્યથાપીષ્ટદઃ
સવ્યે ઽઙ્ગે નૃપતિં દહન્ન્ અતિહિતઃ શેષં ચ લોકાદ્ વદેત્॥એ10