વિષ્ણુસ્મૃતિ · અધ્યાય 43

કૃતપાતકિનઃ પાપાઃ પ્રાણત્યાગાદ્ અનન્તરમ્
યામ્યં પન્થાનમ્ આસાદ્ય દુઃખમ્ અશ્નન્તિ દારુણમ્ ॥

યમસ્ય પુરુષૈર્ ઘોરૈઃ કૃષ્યમાણા યતસ્ તતઃ
સકૃચ્છ્રેણાનુકારેણ નીયમાનાશ્ ચ તે યથા ॥

શ્વભિઃ શૃગાલૈઃ ક્રવ્યાદૈઃ કાકકઙ્કબકાદિભિઃ
અગ્નિતુણ્ડૈર્ ભક્ષ્યમાણા ભુજઙ્ગૈર્ વૃશ્ચિકૈસ્ તથા ॥

અગ્નિના દહ્યમાનાશ્ ચ તુદ્યમાનાશ્ ચ કણ્ટકૈઃ
ક્રકચૈઃ પાટ્યમાનાશ્ ચ પીડ્યમાનાશ્ ચ તૃષ્ણયા ॥

ક્ષુધયા વ્યથમાનાશ્ ચ ઘોરૈર્ વ્યાઘ્રગણૈસ્ તથા
પૂયશોણિતગન્ધેન મૂર્છમાનાઃ પદે પદે ॥

પરાન્નપાનં લિપ્સન્તસ્ તાદ્યમાનાશ્ ચ કિંકરૈઃ
કાકકઙ્કબકાદીનાં ભીમાનાં સદૃશાનનૈઃ ॥

ક્વચિત્ તૈલેન ક્વાથ્યન્તે તાડ્યન્તે મુસલૈઃ ક્વચિત્
આયસીષુ ચ વટ્યન્તે શિલાસુ ચ તથા ક્વચિત્ ॥

ક્વચિદ્ વાન્તમ્ અથાશ્નન્તિ ક્વચિત્ પૂયમ્ અસૃક્ ક્વચિત્
ક્વચિદ્ વિષ્ઠાં ક્વચિન્ માંસં પૂયગન્ધિ સુદારુણમ્ ॥

અન્ધકારેષુ તિષ્ઠન્તિ દારુણેષુ તથા ક્વચિત્
ક્રિમિભિર્ ભક્ષ્યમાણાશ્ ચ વહ્નિતુણ્ડૈઃ સુદારુણૈઃ ॥

ક્વચિચ્ છીતેન બાધ્યન્તે ક્વચિત્ ચામેધ્યમધ્યગાઃ
પરસ્પરમ્ અથાશ્નન્તિ ક્વચિત્ પ્રેતાઃ સુદારુણાઃ ॥

ક્વચિદ્ ભૂતેન તાડ્યન્તે લમ્બમાનાસ્ તથા ક્વચિત્
ક્વચિત્ ક્ષિપ્યન્તિ બાનૌઘૈર્ ઉત્કૃત્યન્તે તથા ક્વચિત્ ॥

કણ્ટેષુ દત્તપાદાશ્ ચ ભુજઙ્ગાભોગવેષ્ટિતાઃ
પીડ્યમાનાસ્ તથા યન્ત્રૈઃ કૃષ્યમાણાશ્ ચ જાનુભિઃ ॥

ભગ્નપૃષ્ઠશિરોગ્રીવાઃ સૂચીકણ્ઠાઃ સુદારુણાઃ
કૂટાગારપ્રમાણૈશ્ ચ શરીરૈર્ યાતનાક્ષમૈઃ ॥

એવં પાતકિનઃ પાપમ્ અનુભૂય સુદુઃખિતાઃ
તિર્યગ્યોનૌ પ્રપદ્યન્તે દુઃખાનિ વિવિધાનિ ચ ॥