વરાહ પુરાણ · અધ્યાય 56

અગસ્ત્ય ઉવાચ ।
અતઃ પરં પ્રવક્ષ્યામિ ધન્યવ્રતમનુત્તમમ્ ।
યેન સદ્યો ભવેદ્ ધન્ય અધન્યોઽપિ હિ યો ભવેત્

માર્ગશીર્ષે સિતે પક્ષે પ્રતિપદ્ યા તિથિર્ભવેત્ ।
તસ્યાં નક્તં પ્રકુર્વીત વિષ્ણુમગ્નિં પ્રપૂજયેત્

વૈશ્વાનરાય પાદૌ તુ અગ્નયેત્યુદરં તથા ।
હવિર્ભુંજાય ચ ઉરો દ્રવિણોદેતિ વૈ ભુજો

સંવર્ત્તાયેતિ ચ શિરો જ્વલનાયેતિ સર્વતઃ ।
અભ્યર્ચ્યૈવં વિધાનેન દેવદેવં જનાર્દનમ્

તસ્યૈવ પુરતઃ કુણ્ડં કારયિત્વા વિઘાનતઃ ।
હોમં તત્ર પ્રકુર્વીત એભિર્મન્ત્રૈર્વિચક્ષણઃ

તતઃ સંયાવકં ચાન્નં ભુઞ્જીયાદ્ ઘૃતસંયુતમ્ ।
કૃષ્ણપક્ષેઽપ્યેવમેવ ચાતુર્માસ્યં તુ યાવતઃ

ચૈત્રાદિષુ ચ ભુઞ્જીત પાયસં સઘૃતં બુધઃ ।
શ્રાવણાદિષુ સક્તૂંશ્ચ તતશ્ચૈતત્ સમાપ્યતે

સમાપ્તે તુ વ્રતે વહ્નિં કાઞ્ચનં કારયેદ્ બુધઃ ।
રક્તવસ્ત્રયુગચ્છન્નં રક્તપુષ્પાનુલેપનમ્

કુઙ્કુમેન તથા લિપ્ય બ્રાહ્મણં દેવદેવ ચ ।
સર્વાવયવસંપૂર્ણં બ્રાહ્મણં પ્રિયદર્શનમ્

પૂજયિત્વા વિધાનેન રક્તવસ્ત્રયુગેન ચ ।
પશ્ચાત્ તં દાપયેત્ તસ્ય મન્ત્રેણાનેન બુદ્ધિમાન્

ધન્યોઽસ્મિ ધન્યકર્માઽસ્મિ ધન્યચેષ્ટોઽસ્મિ ધન્યવાન્ ।
ધન્યેનાનેન ચીર્ણેન વ્રતેન સ્યાં સદા સુખી

એવમુચ્ચાર્ય તં વિપ્રે ન્યસ્ય કોશં મહાત્મનઃ ।
સદ્યો ધન્યત્વમાપ્નોતિ યોઽપિ સ્યાદ્ ભાગ્યવર્જિતઃ

ઇહ જન્મનિ સૌભાગ્યં ધનં ધાન્યં ચ પુષ્કલમ્ ।
અનેન કૃતમાત્રેણ જાયતે નાત્ર સંશયઃ

પ્રાગ્જન્મજનિતં પાપમગ્નિર્દહતિ તસ્ય હ ।
દગ્ધે પાપે વિમુક્તાત્મા ઇહ જન્મન્યસૌ ભવેત્

યોઽપીદં શ્રૃણુયાન્નિત્યં યશ્ચ ભક્ત્યા પઠેદ્ દ્વિજઃ ।
ઉભૌ તાવિહ લોકે તુ ધન્યૌ સદ્યો ભવિષ્યતઃ

શ્રૂયતે ચ વ્રતં ચૈતચ્ચીર્ણમાસીન્મહાત્મના ।
ધનદેન પુરા કલ્પે શૂદ્રયોનૌ સ્થિતેન તુ

॥ ઇતિ શ્રીવરાહપુરાણે ભગવચ્છાસ્ત્રે ષટ્પઞ્ચાશોઽધ્યાયઃ