તારાભટ્ટારિકાનામાષ્ટોત્તરશતકસ્તોત્ર · ભાગ 13

આર્યતારાભટ્ટારિકાનામાષ્ટોત્તરશતકસ્તોત્ર
ઓં નમઃ શ્રીમદાર્યતારાયૈ
શ્રીમત્પોતલકે રમ્યે નાનાધાતુવિરાજિતે ।
નાનાદ્રુમલતાકીર્ણે નાનાપક્ષિનિકૂજિતે ॥ ત્ભ્_1
નાનાનિર્ઝરઝંકારે નાનામૃગસમાકુલે ।
નાનાકુસુમજાતીભિઃ સમન્તાદ્ અધિવાસિતે ॥ ત્ભ્_2
નાનાહૃદયફલોપેતે ષટ્પદોદ્ગીતનિસ્વને ।
કિન્નરૈર્ મધુરૈર્ ગીતૈર્ મત્તવારણસંકુલે ॥ ત્ભ્_3
સિદ્ધવિદ્યાધારગણૈઃ ગન્ધર્વૈશ્ ચ નિનાદિતે ।
મુનિભિર્ વીતરાગૈશ્ ચ સતતં સંનિષેવિતે ॥ ત્ભ્_4
બોધિસત્વગણૈશ્ ચાન્યૈઃ દશભૂમીશ્વરૈર્ અપિ ।
આયતારાદિભિર્ દેવીવિદ્યારાજ્ઞીસહસ્રકૈઃ ॥ ત્ભ્_5
ક્રોધરાજગણૈશ્ ચાન્યૈઃ હયગ્રીવાદિભિર્ વૃતે ।
સર્વસત્વહિતોદ્યુક્તો ભગવાન્ અવલોકિતઃ ॥ ત્ભ્_6
વિજહાર તતઃ શ્રીમાન્ પદ્મગર્ભાસને સ્થિતઃ ।
મહતા તપસા યુક્તો મૈત્ર્યા ચ કૃપયાન્વિતઃ ॥ ત્ભ્_7
ધર્મં દિદેશ તસ્યાં સ મહત્યાં દેવપર્ષદિ ।
તત્રોપવિષ્ટમ્ આગમ્ય વજ્રપાણિર્ મહાબલઃ ॥ ત્ભ્_8
પરમકૃપયા યુક્તઃ પપ્રચ્છેત્ય્ અવલોકિતમ્ ।
તસ્કરોરગસિંહાગ્નિગજવ્યાઘ્રામ્બુસંકટે ॥ ત્ભ્_9
સીદન્ત્ય્ અમી મુને સત્વા મગ્નાઃ સંસારસાગરે ।
બદ્ધાઃ સંસારકૈઃ પાશૈ રાગદ્વેષતમોપહૈઃ ॥ ત્ભ્_10
મુચ્યન્તે યેન સંસારાત્ તન્ મે બ્રૂહિ મહામુને ।
એવમ્ ઉક્તે જગન્નાથઃ સ શ્રીમાન્ અવલોકિતઃ ॥ ત્ભ્_10બિસ્
ઉવાચ મધુરાં વાણીં વજ્રપાણિં પ્રબોધિનમ્ ।
શૃણુ ગુહ્યકરાજેન્દ્ર અમિતાભસ્ય તાયિનઃ ॥ ત્ભ્_11
પ્રણિધાનવશોત્પન્ના મમાજ્ઞા લોકમાતરઃ ।
મહાકરુણયોપેતા જગદુદ્ધરણોદ્ધૃતાઃ ॥ ત્ભ્_12
ઉદિતાદિત્યસંકાશાઃ પૂર્ણેન્દુવદનપ્રભાઃ ।
ભાસયન્તિ દ્રુમાંસ્ તારાઃ સદેવાસુરમાનુષાન્ ॥ ત્ભ્_13
કમ્પયન્તિ ત્રયો લોકાન્ ત્રાસ્યન્તી યક્ષરાક્ષસાન્ ।
નીલોત્પલકરા દેવી મા ભૈર્ મા ભૈર્ ઇતિ બ્રુવન્ ॥ ત્ભ્_14
જગત્સંરક્ષણાર્થાય અહમ્ ઉત્પાદિતા જિનૈઃ ।
કાન્તારે શસ્ત્રસંપર્કે નાનાભયસમાકુલે ॥ ત્ભ્_15
સ્મરણાદ્ એવ નામાનિ સત્વાન્ રક્ષામ્ય્ અહં સદા ।
તારયિષ્યામ્ય્ અહં નાથ નાનાભયમહાર્ણવાત્ ॥ ત્ભ્_16
તેન તારેતિ મં લોકે ગાયન્તિ મુનિપુંગવાઃ ।
કૃતાઞ્જલિપુટા ભૂત્વા તતઃ સાદરસાધ્વસાઃ ॥ ત્ભ્_17
જ્વલતીર્યન્તરીક્ષેસ્થ ઇદં વચનમ્ અબ્રવીત્ ।
નામાષ્ટશતકં બ્રૂહિ યત્ પુરા કીર્તિતં જિનૈઃ ॥ ત્ભ્_18

દાશભૂમીશ્વરૈર્ નાથૈર્ બોધિસત્વૈર્ મહર્દ્ધિકૈઃ ।
સર્વપાપહરં પુણ્યં માઙ્ગલ્યં કીર્તિવર્ધનમ્ ॥ ત્ભ્_19
ધનહાન્યકરં ચૈવ આરોગ્યપુષ્ટિવર્ધનમ્ ।
મૈત્રીમ્ આલમ્બ્ય સત્વાનાં તત્ કીર્તય મહામુને ॥ ત્ભ્_20
એવમ્ ઉક્તે ઽથ ભગવાન્ પ્રહસન્ન્ અવલોકિતઃ ।
વ્યવલોક્ય દિશઃ સર્વા મૈત્ર્યા સ્ફુરણયા દૃશા ॥ ત્ભ્_21
દક્ષિણકરમ્ ઉદ્ધૃત્ય પુણ્યલક્ષણમણ્ડિતમ્ ।
તમ્ ઉવાચ મહાપ્રાજ્ઞઃ સાધુ સાધુ મહાતપઃ ॥ ત્ભ્_22
નામાનિ શૃણુ મહાભાગ સર્વસત્વૈકવત્સલઃ ।
યાનિ સંકીર્ત્ય મનુજાઃ સમ્યક્ તે સ્યુર્ ધનેશ્વરાઃ ॥ ત્ભ્_23
સર્વવ્યાધિવિનિર્મુક્તાઃ સર્વૈશ્વર્યગુણાન્વિતાઃ ।
અકાલમૃત્યુનિર્દગ્ધાશ્ ચ્યુતા યાન્તિ સુખાવતીમ્ ॥ ત્ભ્_24
તાન્ય્ અહં સંપ્રવક્ષ્યામિ દેવસંઘાઃ શૃણુધ્વ મે
અનુમોદેત સદ્ધર્મે ભવિષ્યધ્વં સુનિર્વૃતાઃ ॥ ત્ભ્_25
ઓં લોચને સુલોચને તારે તારોત્સવે સર્વસત્વાનુકમ્પિનિ ।
સર્વસત્વોત્તારિણિ સહસ્રભુજે સહસ્રનેત્રે ॥ ત્ભ્_26
ઓં નમો ભગવતે ઽવલોક્ય આવલોક્યા ।
સર્વસત્વાનાં ચાહં ફુટ્ સ્વાહા ॥ ત્ભ્_27
ઓં શુદ્ધે વિશુદ્ધે શોધનવિશોધનિ ।
સુગતાત્મજે મૈત્રીહૃદયે નિર્મલે શ્યામે શ્યામરૂપિણિ ॥ ત્ભ્_28
મહાપ્રાજ્ઞે પ્રવરે પ્રવરભૂષિતે પરાજિતે ।
મહારૌદ્રિ વિશ્વરૂપિ મહાયશ ॥ ત્ભ્_29
કલ્પાગ્નિમહાતેજા લોકધાત્રીમહાયશા ।
સરસ્વતી વિશાલાક્ષી પ્રજ્ઞાશ્રીબુદ્ધિવર્ધની ॥ ત્ભ્_30
ઓં ધૃતિદા પુષ્ટિદા સ્વાહા ઓંકારા કામરૂપિણી ।
સર્વસત્વહિતોદ્યુક્તા સંગ્રામે તારણી જયા ॥ ત્ભ્_31
પ્રજ્ઞાપારમિતાદેવી આર્યાતારા મનોરમા ।
દુન્દુભિસખિની પૂર્ણવિદ્યારાજ્ઞી પ્રિયંવદા ॥ ત્ભ્_32
ચન્દ્રાનના મહાગૌરી અજિતા પીતવાસસા ।
મહામાયા મહાશ્વેતા મહાબલપરાક્રમા ॥ ત્ભ્_33
મહારૌદ્રી મહાચણ્ડી દુષ્ટસત્વનિસૂદની ।
પ્રશાન્તા શાન્તરૂપા ચ વિજયા જ્વલનપ્રભા ॥ ત્ભ્_34
વિદ્યુન્માલી ધ્વજી ખડ્ગી ચક્રી ચાપયુતાયુધા ।
જમ્ભની સ્તમ્ભની કાલી કાલરાત્રી નિશાચરી ॥ ત્ભ્_35
રક્ષણી મોહિની શાન્તા કાન્તા વિભાવિની શુભા ।
બ્રાહ્મણી વેદમાતા ચ ગુહા ચ ગુહવાસિની ॥ ત્ભ્_36
માઙ્ગલ્યા શઙ્કરી સૌમ્યા જાતવેદા મનોજવા ।
કાપાલિની મહાભાગા સંધ્યા સત્યાપરાજિતા ॥ ત્ભ્_37
સાર્થવાહા કૃપદૃષ્ટી નષ્ટમાર્ગપ્રદર્શની ।
વરદા શાસની શાસ્ત્રી સ્ત્રીરૂપામિતવિક્રમા ॥ ત્ભ્_38

શવલી યોગિની સિદ્ધા ચાણ્ડાલી ચામૃતા ધ્રુવા ।
ધન્યા પુણ્યા મહાભાગા સુભાગા પ્રિયદર્શની ॥ ત્ભ્_39
કૃતાન્તત્રાસની ભીમા ઉગ્રા ઉગ્રમહાતપા ।
જગદેકહિતોદ્યુક્તા શરણ્ય ભક્તિવત્સલા ॥ ત્ભ્_40
વાગીશ્વરી શિવા સૂક્ષ્મા નિત્યા સર્વાર્થમાતૃકા ।
સર્વાર્થસાધની ભદ્રા ગોપ્ત્રી ધાત્રી ધનંજયા ॥ ત્ભ્_41
અભયા ગૌતમી પુણ્યા શ્રીમલ્લોકેશ્વરાત્મજા ।
તારા નામગુણાનન્તા સર્વાશાપરિપૂરણી ॥ ત્ભ્_42
નામાષ્ટોત્તરશતકં તત્ કીર્તિતં હિતેન વઃ ।
રહસ્યમ્ અદ્ભુતં ગુહ્યં દેવાનામ્ અપિ દુર્લભમ્ । 43
સૌભાગ્યં ભાગ્યકરણં સર્વકીલ્બિષનાશનમ્ ।
સર્વવ્યાધિપ્રશમનં સર્વસત્વસુખાવહમ્ ॥ ત્ભ્_44
ત્રિકારં યઃ પઠેદ્ ધીમાન્ શુચિઃ સ્નાનસમાહિતઃ ।
અચિરેણૈવ કાલેન રાજ્યશ્રિયમ્ અવાપ્નુયાત્ ॥ ત્ભ્_45
દુઃખિતઃ સ્યાત્ સુખી નિત્યદરિદ્રો ધનવાન્ ભવેત્ ।
જડો ભવેન્ મહાપ્રાજ્ઞો મેધાવી ચ ન સંશયઃ ॥ ત્ભ્_46
બન્ધનાન્ મુચ્યતે બદ્ધો વ્યવહારે જયો ભવેત્ ।
શત્રવો મિત્રતાં યાન્તિ શૃઙ્ગિણશ્ ચાથ દંષ્ટ્રિણઃ ॥ ત્ભ્_47
સંગ્રામે સંકટે દુર્ગે નાનાભયસમાકુલે ।
સ્મરણાદ્ એવ નામાનિ સર્વપાપાન્ય્ અપોહતિ ॥ ત્ભ્_48
નાકાલમૃત્યુર્ ભવતિ પ્રાપ્નોતિ વિપુલાં શ્રિયમ્ ।
માનુશ્યં સફલં જન્મ યસ્ય કસ્ય મહાત્મનઃ ॥ ત્ભ્_49
યશ્ ચેદં પ્રાતર્ ઉત્થાય માનવઃ કીર્તયિષ્યતિ ।
સ દીર્ઘકાલમ્ આયુષ્માન્ શ્રિયં ચ લભતે નરઃ ॥ ત્ભ્_50
દેવા નાગાસ્ તથા યક્ષા ગન્ધર્વાઃ કટપૂતનાઃ ।
પિશાચરાક્ષસા ભૂતા માતરો રૌદ્રતેજસઃ ॥ ત્ભ્_51
ક્ષયાપસ્મારકારકશ્ ચૈવ ક્ષતકાખોર્ડકાદયઃ ।
ડાકિન્યાસ્ તારકા પ્રેતાઃ સ્કન્દા મારા મહાગ્રહાઃ ॥ ત્ભ્_52
છાયામ્ અપિ ન લઙ્ઘન્તે કિં પુનસ્ તસ્ય વિગ્રહઃ ।
દુષ્ટસત્વા ન વાધન્તે વ્યાધયો નાક્રમન્તિ ચ ॥ ત્ભ્_53
દેવાસુરમ્ અપિ સંગ્રામમ્ અનુભવન્તિ મહર્દ્ધિકાઃ ।
સર્વૈશ્વર્યગુણૈર્ યુક્તઃ પુત્રપૌત્રૈશ્ ચ વર્ધતે ॥ ત્ભ્_54
જાતિસ્મરો ભવેદ્ ધીમાન્ કુલીનઃ પ્રિયદર્શનઃ ॥ ત્ભ્_55
પ્રીતિમાંશ્ ચ મહાવાગ્મી સર્વશાસ્ત્રવિશારદઃ ॥ ત્ભ્_56
કલ્યાણમિત્રસંસેવી બોધિચિત્તવિભૂષિતઃ ।
સદાવિરહિતો બુદ્ધૈર્ યત્ર યત્રોપપદ્યતે ॥ ત્ભ્_57
ઇત્ય્ આર્યતારાભટ્ટારિકાયા નામાષ્ટોત્તરશતકં બુદ્ધભાષિતં સમાપ્તમ્ ।
॥ શુભમ્ ॥