તૈત્તિરીયોપનિષદ · અધ્યાય 3.10

ન કઞ્ચન વસતૌ પ્રત્યાચક્ષીત । તદવ્રતમ્ । તસ્માદ્યયા કયા ચ વિધયા બહ્વન્નં પ્રાપ્નુયાત્ । અરાધ્યસ્મા અન્નમિત્યાચક્ષતે । એતદ્વૈ મુખતો ઽનં રાદ્ધમ્ । મુખતો ઽસ્મા અન્નં રાધ્યતે । એતદ્વૈ મધ્યતો ઽનં રાદ્ધમ્ । મધ્યતો ઽસ્મા અન્નં રાધ્યતે । એદદ્વૈ અન્તતો ઽન્નં રાદ્ધમ્ । અન્તતો ઽસ્મા અન્નં રાધ્યતે ॥

ક્ષેમ ઇતિ વાચિ । યોગક્ષેમ ઇતિ પ્રાણાપાનયોઃ । કર્મેતિ હસ્તયોઃ । ગતિરિતિ પાદયોઃ । વિમુક્તિરિતિ પાયૌ । ઇતિ માનુષીઃ સમાજ્ઞાઃ । અથ દૈવીઃ । તૃપ્તિરિતિ વૃષ્ટૌ । બલમિતિ વિદ્યુતિ ॥

યશ ઇતિ પશુષુ । જ્યોતિરિતિ નક્ષત્રેષુ । પ્રજાતિરમૃતમાનન્દ ઇત્યુપસ્થે । સર્વમિત્યાકાશે । તત્પ્રતિષ્ઠેત્યુપાસીત । પ્રતિષ્ઠાવાન્ ભવતિ । તન્મહ ઇત્યુપાસીત । મહાન્ભવતિ । તન્મન ઇત્યુપાસીત । માનવાન્ભવતિ ॥

તન્નમ ઇત્યુપાસીત । નમ્યન્તે ઽસ્મૈ કામાઃ । તદબ્રહ્મેત્યુપાસીત । બ્રહ્મવાન્ભવતિ । તદબ્રહ્મણઃ પરિમર ઇત્યુપાસીત । પર્યેણં મ્રિયન્તે દ્વિષન્તઃ સપત્નાઃ । પરિ યે ઽપ્રિયા ભ્રાતૃવ્યાઃ । સ યશ્ચાયં પુરુષે । યશ્ચાસાવાદિત્યે । સ એકઃ ॥

સ ય એવંવિત્ । અસ્માલ્લોકાત્પ્રેત્ય । એતમન્નમયમાત્માનમુપસઙ્ક્રમ્ય ।એતં પ્રાણમયમાત્માનમુપસઙ્ક્રમ્ય । એતં મનોમયમાત્માનમુપસઙ્ક્રમ્ય । એતં વિજ્ઞાનમયમાત્માનમુપસઙ્ક્રમ્ય । એતમાનન્દમયમાત્માનમુપસઙ્ક્રમ્ય । ઇમાંલ્લોકન્કામાન્ની કામરૂપ્યનુસઞ્ચરન્ । એતત્ સામ ગાયન્નાસ્તે । હા3વુ હા3વુ હા3વુ ॥

અહમન્નમહમન્નમહમન્નમ્ । અહમન્નાદો3 ઽહમન્નાદો3 ઽહમન્નાદઃ । અહં શ્લોકકૃદહં શ્લોકકૃદહં શ્લોકકૃત્ । અહમસ્મિ પ્રથમજા ઋતા3સ્ય । પૂર્વં દેવેભ્યો ઽમૃતસ્ય ના3ભાયિ । યો મા દદાતિ સ ઇદેવ મા3વાઃ । અહમન્નમન્નમદન્તમા3દ્મિ । અહં વિશ્વં ભુવનમભ્યભવા3મ્ । સુવર્ન જ્યોતિઃ । ય એવં વેદ । ઇત્યુપનિષત્ ॥