સ્કંદ પુરાણ · અધ્યાય 7.333

॥ ઈશ્વર ઉવાચ ॥ ॥
બલભદ્રાચ્ચ પૂર્વેણ સ્થિતા ચાસીત્સરિદ્વરા ॥
દુર્વાસેશ્વરનામેતિ બલલિંગં પ્રતિષ્ઠિતમ્

સર્વપાપપ્રશમનં દૃષ્ટં સર્વસુખાવહમ્॥
સ્નાત્વા ચાસ્ય ત્વમાવાસ્યાં પિંડદાનં દદાતિ યઃ

કલ્પકોટિશતં સાગ્રં પિતૄણાં તૃપ્તિમાવહેત્ ॥
દુર્વાસેશ્વરનામાનં તત્ર પૂજ્ય વિધાનતઃ

કોટિયજ્ઞફલં પ્રાપ્ય સર્વાન્કામા નવાપ્નુયાત્॥
તત્ર લિંગાન્યનેકાનિ ઋષિભિઃ સ્થાપિતાનિ તુ

દૃષ્ટ્વા સ્પૃષ્ટ્વા પૂજયિત્વા મુક્તઃ સ્યાત્સર્વકિલ્બિષૈઃ ॥
ઇત્યેતત્કથિતં દેવિ ક્ષેત્રાદ્યં તં યથાક્રમમ્

ભદ્રાયાઃ પશ્ચિમાત્પૂર્વં યથાનુક્રમમાદિતઃ ॥
શ્રુતં પાપોપશમનં કોટિયજ્ઞફલપ્રદમ્

અથ ક્ષેત્રસ્ય પરિધિસ્થાનં મધુમતીતિ ચ ॥
તસ્માન્નૈરૃત્યદિગ્ભાગે સ્થાનં ખંડઘટેતિ ચ

તત્ર પિંગેશ્વરો દેવઃ સમુદ્રતટસન્નિધૌ ॥
કૂપાનાં સપ્તકં તત્ર પિતૄણાં યત્ર પાણયઃ ॥
દૃશ્યંતેઽદ્યાપિ દેવેશિ યત્ર પર્વણિપર્વણિ

તત્ર શ્રાદ્ધં નરઃ કૃત્વા ગયાકોટિગુણં ફલમ્ ॥
લભતે નાઽત્ર સન્દેહઃ સોમામા યદિ જાયતે

તત્રૈવ નાતિદૂરે તુ ભદ્રાયાઃ સંગમઃ સ્મૃતઃ ॥
પશ્ચિમાત્સંગમાત્પૂર્વઃ સંગમઃ સમુદાહૃતઃ

યત્પુણ્યં લભતે દેવિ પૂર્વ પશ્ચિમસંગમે ॥
ગંગાસાગરયોસ્તત્ર તદ્ભદ્રાસંગમે લભેત્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસ ખણ્ડે પ્રથમે પ્રભાસક્ષેત્રમાહાત્મ્યે તપ્તોદકસ્વામિમાહાત્મ્યે મધુમત્યાં પિંગેશ્વરભદ્રામાહાત્મ્યવર્ણનંનામ ત્રયસ્ત્રિંશદુત્તરત્રિશતતમોઽધ્યાયઃ