સ્કંદ પુરાણ · અધ્યાય 7.283

॥ ઈશ્વર ઉવાચ ॥ ॥
તં દૃષ્ટ્વા ઘોરવદનં મદં દેવઃ શતક્રતુઃ ॥
આયાંતં ભક્ષયિષ્યન્તં વ્યાત્તાનનમિવાન્તકમ્

ભયાત્સ્તંભિતરૂપેણ લેલિહાનં મુહુર્મુહુઃ ॥
પ્રણતોઽબ્રવીન્મહાદેવિ ચ્યવનં ભયપીડિતઃ

સોમાર્હાવશ્વિનાવેતાવદ્યપ્રભૃતિ ભાર્ગવ ॥
ભવિષ્યતઃ સર્વમેતદ્વચઃ સત્યં બ્રવીમિ તે

મા તે મિથ્યા સમારમ્ભો ભવત્વથ તપોધન ॥
જાનામિ ચાહં વિપ્રર્ષે ન મિથ્યા ત્વં કરિષ્યસિ

સોમાર્હાવશ્વિનાવેતૌ યથૈવાદ્ય ત્વયા કૃતૌ ॥
ભૂય એવ તુ તે વીર્યં પ્રકાશેદિતિ ભાર્ગવ

સુકન્યાયાઃ પિતુશ્ચાસ્ય લોકે કીર્તિર્ભવેદિતિ ॥
અતો મયૈતદ્વિહિતં તદ્વીર્યસ્ય પ્રકાશનમ્ ॥
તસ્માત્પ્રસાદં કુરુ મે ભવત્વેતદ્યથેચ્છસિ

એવમુક્તસ્ય શક્રેણ ચ્યવનસ્ય મહાત્મનઃ ॥
મન્યુર્વ્યુપારમચ્છીઘ્રં માનશ્ચૈવ સુરેશિતુઃ

મદં ચ વ્યભજદ્દેવિ પાને સ્ત્રીષુ ચ વીર્યવાન્ ॥
અક્ષેષુ મૃગયાયાં ચ પૂર્વં સૃષ્ટં પુનઃપુનઃ ॥
તથા મદં વિનિક્ષિપ્ય શક્રં સંતર્પ્ય ચેંદુના

અશ્વિભ્યાં સહિતાન્સર્વાન્યાજયિત્વા ચ તં નૃપમ્ ॥
વિખ્યાપ્ય વીર્યં સર્વેષુ લોકેષુ વરવર્ણિનિ

સુકન્યયા મહારણ્યે ક્ષેત્રેઽસ્મિન્વિજહાર સઃ ॥
તસ્યૈતદ્દેવિ સંયુક્તં ચ્યવનેશ્વરનામભૃત્

લિંગં મહાપાપહરં ચ્યવ નેન પ્રતિષ્ઠિતમ્ ॥
પૂજયેત્તં વિધાનેન સોઽશ્વમેધફલં લભેત્

તસ્માચ્ચન્દ્રમસસ્તીર્થમૃષયઃ પર્યુપાસતે ॥
વૈખાનસાખ્યા ઋષયો વાલખિલ્યાસ્તથૈવ ચ

અત્રાશ્વિને માસિ નરઃ પૌર્ણમાસ્યાં વિશેષતઃ ॥
શ્રાદ્ધં કુર્યાદ્વિધાનેન બ્રાહ્મણાન્ભોજયેત્પૃથક્ ॥
કોટિતીર્થફલં તસ્ય ભવેન્નૈઽવાત્ર સંશયઃ

ય ઇમાં શૃણુયાદ્દેવિ કથાં પાતકનાશિનીમ્ ॥
સમસ્તજન્મસંભૂતાત્પાપાન્મુક્તો ભવેન્નરઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે ચ્યવનેશ્વરમાહાત્મ્યવર્ણનંનામ ત્ર્યશીત્યુત્તરદ્વિશતતમોઽધ્યાયઃ