સ્કંદ પુરાણ · અધ્યાય 5.203

શ્રીમાર્કણ્ડેય ઉવાચ -
તતો ગચ્છેદ્ધરાધીશ કોટિતીર્થમનુત્તમમ્ ।
યત્ર સિદ્ધા મહાભાગાઃ કોટિસંખ્યા મહર્ષયઃ

તપઃ કૃત્વા સુવિપુલમૃષિભિઃ સ્થાપિતઃ શિવઃ ।
તથા કોટીશ્વરી દેવી ચામુણ્ડા મહિષાર્દિની

કૃષ્ણપક્ષે ચતુર્દશ્યાં માસિ ભાદ્રપદે નૃપ ।
તીર્થકોટીઃ સમાહૂય મુનિભિઃ સ્થાપિતઃ શિવઃ

તસ્યાં તિથૌ ચ હસ્તર્ક્ષં સર્વપાપપ્રણાશનમ્ ।
તત્ર તીર્થે તદા ગત્વા સ્નાનં કૃત્વા સમાહિતઃ

નરકાદુદ્ધરત્યાશુ પુરુષાનેકવિંશતિમ્ ।
તિલોદકપ્રદાનેન કિમુત શ્રાદ્ધદો નરઃ

સ્નાનં દાનં જપો હોમઃ સ્વાધ્યાયો દેવતાર્ચનમ્ ।
તસ્ય તીર્થસ્ય યોગેન સર્વં કોટિગુણં ભવેત્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે કોટિતીર્થમાહાત્મ્યવર્ણનં નામ ત્ર્યુત્તરદ્વિશતતમોઽધ્યાયઃ ॥