સ્કંદ પુરાણ · અધ્યાય 5.183

શ્રીમાર્કણ્ડેય ઉવાચ -
અતઃ પરં મહારાજ ગચ્છેત્કેદારસંજ્ઞકમ્ ।
યત્ર ગત્વા મહારાજ શ્રાદ્ધં કૃત્વા પિબેજ્જલમ્ ।
સમ્પૂજ્ય દેવદેવેશં કેદારોત્થં ફલં લભેત્

યુધિષ્ઠિર ઉવાચ -
કથમત્ર સુરશ્રેષ્ઠ કેદારાખ્યઃ સ્થિતઃ સ્વયમ્ ।
ઉત્તરે નર્મદાકૂલે એતદ્વિસ્તરતો વદ

શ્રીમાર્કણ્ડેય ઉવાચ -
પુરા કૃતયુગસ્યાદૌ શઙ્કરસ્તુ મહેશ્વરઃ ।
ભૃગુણારાધિતઃ શપ્તઃ શ્રિયા ચ ભૃગુકચ્છકે

અપવિત્રમિદં ક્ષેત્રં સર્વવેદવિવર્જિતમ્ ।
ભવિષ્યતિ નૃપશ્રેષ્ઠ ગતેત્યુક્ત્વા હરિપ્રિયા

તપશ્ચચાર વિપુલં ભૃગુર્વર્ષસહસ્રકમ્ ।
વાયુભક્ષો નિરાહારશ્ચિરં ધમનિસંતતઃ

તતઃ પ્રત્યક્ષતામાગાલ્લિઙ્ગીભૂતો મહેશ્વરઃ ।
પ્રાદુર્ભૂતસ્તુ સહસા ભિત્ત્વા પાતાલસપ્તકમ્

દદર્શાથ ભૃગુર્દેવમૌત્પલીં કેલિકામિવ ।
સ્તુતિં ચક્રે સ દેવાય સ્થાણવે ત્ર્યમ્બકેતિ ચ

એવં સ્તુતઃ સ ભગવાન્ પ્રોવાચ પ્રહસન્નિવ ।
પુનઃ પુનર્ભૃગું મત્તઃ કિંતુ પ્રાર્થયસે મુને

ભૃગુરુવાચ -
પઞ્ચક્રોશમિદં ક્ષેત્રં પદ્મયા શાપિતં વિભો ।
ઉપવિત્રમિદં ક્ષેત્રં સર્વવેદવિવર્જિતમ્ ।
ભવિષ્યતીતિ ચ પ્રોચ્ય ગતા દેવી વિદં પ્રતિ

પુનઃ પવિત્રતાં યાતિ યથેદં ક્ષેત્રમુત્તમમ્ ।
તથા કુરુ મહેશાન પ્રસન્નો યદિ શઙ્કર

ઈશ્વર ઉવાચ -
કેદારાખ્યમિદં બ્રહ્મંલ્લિઙ્ગમાદ્યં ભવિષ્યતિ ।
કૃત્વેદમાદિલિઙ્ગાનિ ભવિષ્યન્તિ દશૈવ હિ

એકાદશમદૃશ્યં હિ ક્ષેત્રમધ્યે ભવિષ્યતિ ।
પાવયિષ્યતિ તત્ક્ષેત્રમેકાદશઃ સ્વયં વિભુઃ

તથા વૈ દ્વાદશાદિત્યા મત્પ્રસાદાત્તુ મૂર્તિતઃ ।
વસિષ્યન્તિ ભૃગુક્ષેત્રે રોગદુઃખનિબર્હણાઃ

દુર્ગાઃ હ્યષ્ટાદશ તથા ક્ષેત્રપાલાસ્તુ ષોડશ ।
ભૃગુક્ષેત્રે ભવિષ્યન્તિ વીરભદ્રાશ્ચ માતરઃ

પવિત્રીકૃતમેતદ્ધિ નિત્યં ક્ષેત્રં ભવિષ્યતિ ।
નાઘમાસે હ્યુષઃકાલે સ્નાત્વા માસં જિતેન્દ્રિયઃ

યઃ પૂજયતિ કેદારં સ ગચ્છેચ્છિવમન્દિરમ્ ।
તસ્મિંસ્તીર્થે નરઃ સ્નાત્વા પિત્ઃનુદ્દિશ્ય ભારત ।
શ્રાદ્ધં દદાતિ વિધિવત્તસ્ય પ્રીતાઃ પિતામહાઃ

ઇતિ તે કથિતં સમ્યક્કેદારાખ્યં સવિસ્તરમ્ ।
સર્વપાપહરં પુણ્યં સર્વદુઃખપ્રણાશનમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે કેદારેશ્વરતીર્થમાહાત્મ્યવર્ણનં નામ ત્ર્યશીત્યુત્તરશતતમોઽધ્યાયઃ ॥