સ્કંદ પુરાણ · અધ્યાય 5.173

શ્રીમાર્કણ્ડેય ઉવાચ -
તતો ગચ્છેત્તુ રાજેન્દ્ર તીર્થં પરમશોભનમ્ ।
નર્મદાદક્ષિણે કૂલે સર્વપાપપ્રણાશનમ્

સિદ્ધેશ્વરમિતિ ખ્યાતં મહાપાતકનાશનમ્ ।
યત્ર શુદ્ધિં પરાં પ્રાપ્તો દેવદેવો મહેશ્વરઃ ।
પુરા હત્યાયુતઃ પાર્થ દેવદેવસ્ત્રિશૂલધૃક્

પુરા પઞ્ચશિરા આસીદ્બ્રહ્મા લોકપિતામહઃ ।
તેનાનૃતં વચશ્ચોક્તં કસ્મિંશ્ચિત્કારણાન્તરે

તચ્છ્રુત્વા સહસા તસ્મૈ ચુકોપ પરમેશ્વરઃ ।
છેદયામાસ ભગવાન્મૂર્ધાનં કરજૈસ્તદા

તસ્ય તત્કરસંલગ્નં ચ્યવતે ન કદાચન ।
તતો હિ દેવદેવેશઃ પર્યટન્ પૃથિવીમિમામ્

તતો વારાણસીં પ્રાપ્તસ્તસ્યાં તદપતચ્છિરઃ ।
પતિતે તુ કપાલે ચ બ્રહ્મહત્યા ન મુઞ્ચતિ

તતસ્તુ સાગરે ગત્વા પૂર્વે ચ દક્ષિણે તથા ।
પશ્ચિમે ચોત્તરે પાર્થ દેવદેવો મહેશ્વરઃ

પર્યટન્સર્વતીર્થેષુ બ્રહ્મહત્યા ન મુઞ્ચતિ ।
નર્મદાદક્ષિણે કૂલે સુતીર્થં પ્રાપ્તવાન્ પ્રભુઃ

કુલકોટિં સમાસાદ્ય પ્રાર્થયામાસ ચાત્મવાન્ ।
પ્રાયશ્ચિત્તં તતઃ કૃત્વા બભૂવ ગતકલ્મષઃ

તતો નિષ્કલ્મષો જાતો દેવદેવો મહેશ્વરઃ ।
હત્વા સુરેભ્યસ્તત્સ્થાનં તતશ્ચાન્તર્દધે પ્રભુઃ

તદાપ્રભૃતિ તત્તીર્થં શુદ્ધરુદ્રેતિ કીર્તિતમ્ ।
વિખ્યાતં ત્રિષુ લોકે બ્રહ્મહત્યાહરં પરમ્

માસે માસે સિતે પક્ષેઽમાવાસ્યાયાં યુધિષ્ઠિર ।
સ્નાત્વા તત્ર વિધાનેન તર્પયેત્પિતૃદેવતાઃ

દદ્યાત્પિણ્ડં પિત્ઃણાં તુ ભાવિતેનાન્તરાત્મના ।
તસ્ય તે દ્વાદશાબ્દાનિ સુતૃપ્તાઃ પિતરો નૃપ

ગન્ધધૂપપ્રદીપાદ્યૈરભ્યર્ચ્ય પરમેશ્વરમ્ ।
શુદ્ધેશ્વરાભિધાનં તુ શિવલોકે મહીયતે

એતત્તે કથિતં રાજઞ્છુદ્ધરુદ્રમનુત્તમમ્ ।
મયા શ્રુતં યથા દેવસકાશાચ્છૂલપાણિનઃ ।
મુચ્યતે સર્વપાપેભ્યો રુદ્રલોકં સ ગચ્છતિ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શુદ્ધેશ્વરતીર્થમાહાત્મ્યવર્ણનં નામ ત્રિસપ્તત્યુત્તરશતતમોઽધ્યાયઃ ॥