સ્કંદ પુરાણ · અધ્યાય 5.166

માર્કણ્ડેય ઉવાચ -
તતઃ સિદ્ધેશ્વરી દેવી વૈષ્ણવી પાપનાશિની ।
આનન્દં પરમં પ્રાપ્તા દૃષ્ટ્વા સ્થાનં સુશોભનમ્

તત્ર તીર્થે નરઃ સ્નાત્વા પૂજયેત્પિતૃદેવતાઃ ।
દેવીં પશ્યતિ યો ભક્ત્યા મુચ્યતે સર્વપાતકૈઃ

મૃતવત્સા તુ યા નારી વન્ધ્યા સ્ત્રીજનની તથા ।
પુત્રં સા લભતે નારી શીલવન્તં ગુણાન્વિતમ્

તત્ર તીર્થે તુ યઃ સ્નાત્વા પશ્યેદ્દેવીં સુભક્તિતઃ ।
અષ્ટમ્યાં વા ચતુર્દશ્યાં સર્વકાલેઽથવા નૃપ

સઙ્ગમે તુ તતઃ સ્નાતા નારી વા પુરુષોઽપિ વા ।
પુત્રં ધનં તથા દેવી દદાતિ પરિતોષિતા

ગોત્રરક્ષાં પ્રકુરુતે દૃષ્ટા દેવી સુપૂજિતા ।
પ્રજાં ચ પાતિ સતતં પૂજ્યમાના ન સંશયઃ

નવમ્યાં ચ મહારાજ સ્નાત્વા દેવીમુપોષિતઃ ।
પૂજયેત્પરયા ભક્ત્યા શ્રદ્ધાપૂતેન ચેતસા

સ ગચ્છેત્પરમં લોકં યઃ સુરૈરપિ દુર્લભઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે સિદ્ધેશ્વરતીર્થમાહાત્મ્યવર્ણનં નામ ષટ્ષષ્ટ્યુત્તરશતતમોઽધ્યાયઃ ॥