સ્કંદ પુરાણ · અધ્યાય 5.151

શ્રીમાર્કણ્ડેય ઉવાચ -
ઉત્તરે નર્મદાકૂલે તીર્થં પરમશોભનમ્ ।
જયવારાહમાહાત્મ્યં સર્વપાપપ્રણાશનમ્

ઉદ્ધૃતા જગતી યેન સર્વદેવનમસ્કૃતા ।
લોકાનુગ્રહબુદ્ધ્યા ચ સંસ્થિતો નર્મદાતટે

તત્ર તીર્થે તુ યઃ સ્નાત્વા વીક્ષતે મધુસૂદનમ્ ।
મુચ્યતે સર્વપાપેભ્યો દશજન્માનુકીર્તનાત્

મત્સ્યઃ કૂર્મો વરાહશ્ચ નરસિંહોઽથ વામનઃ ।
રામો રામશ્ચ કૃષ્ણશ્ચ બુદ્ધઃ કલ્કિશ્ચ તે દશ

યુધિષ્ઠિર ઉવાચ -
મત્સ્યેન કિં કૃતં તાત કૂર્મેણ મુનિસત્તમ ।
વરાહેણ ચ કિં કર્મ નરસિંહેન કિં કૃતમ્

વામનેન ચ રામેણ રાઘવેણ ચ કિં કૃતમ્ ।
બુદ્ધરૂપેણ કિં વાપિ કલ્કિના કિં કૃતં વદ

એવમુક્તસ્તુ વિપ્રેન્દ્રો ધર્મપુત્રેણ ધીમતા ।
ઉવાચ મધુરાં વાણીં તદા ધર્મસુતં પ્રતિ

શ્રીમાર્કણ્ડેય ઉવાચ -
મીનો ભૂત્વા પુરા કલ્પે પ્રીત્યર્થં બ્રહ્મણો વિભુઃ ।
સમર્પયત્સમુદ્ધૃત્ય વન્દાન્મગ્નાન્મહાર્ણવે

અમૃતોત્પાદને રાજન્કૂર્મો ભૂત્વા જગદ્ગુરુઃ ।
મન્દરં ધારયામાસ તથા દેવીં વસુંધરામ્

ઉજ્જહાર ધરાં મગ્નાં પાતાલતલવાસિનીમ્ ।
વારાહં રૂપમાસ્થાય દેવદેવો જનાર્દનઃ

નરસ્યાર્દ્ધતનું કૃત્વા સિંહસ્યાર્દ્ધતનું તથા ।
હિરણ્યકશિપોર્વક્ષો વિદદાર નખાઙ્કુશૈઃ

જટી વામનરૂપેણ સ્તૂયમાનો દ્વિજોત્તમૈઃ ।
તદ્દિવ્યં રૂપમાસ્થાય ક્રમિત્વા મેદિનીં ક્રમૈઃ

કૃતવાંશ્ચ બલિં પશ્ચાત્પાતાલતલવાસિનમ્ ।
સ્થાપયિત્વા સુરાન્ સર્વાન્ ગતો વિષ્ણુઃ સ્વકં પુરમ્

જમદગ્નિસુતો રામો ભૂત્વા શસ્ત્રભૃતાં વરઃ ।
ક્ષત્રિયાન્ પૃથિવીપાલાનવધીદ્ધૈહયાદિકાન્

કશ્યપાય મહીં દત્ત્વા સપર્વતવનાકરામ્ ।
તપસ્તપતિ દેવેશો મહેન્દ્રેઽદ્યાપિ ભારત

તતો દાશરથી રામો રાવણં દેવકણ્ટકમ્ ।
સગણં સમરે હત્વા રાજ્યં દત્ત્વા વિભીષણે

પાલયિત્વા નયાદ્ભૂમિં મખૈઃ સંતર્પ્ય દેવતાઃ ।
સ્વર્ગં ગતો મહાતેજા રામો રાજીવલોચનઃ

વસુદેવગૃહે ભૂયઃ સંકર્ષણસહાયવાન્ ।
અવતીર્ણો જગન્નાથો વાસુદેવો યુધિષ્ઠિર

સોઽવધીત્તવ સામર્થ્યાદ્વધાર્થં દુષ્ટભૂભૃતામ્ ।
ચાણૂરકંસકેશીનાં જરાસંધસ્ય ભારત

તેન ત્વં સુસહાયેન હત્વા શત્રૂન્નરેશ્વર ।
ભોક્ષ્યસે પૃથિવીં સર્વાં ભ્રાતૃભિઃ સહ સંભૃતામ્

તથા બુદ્ધત્વમપરં નવમં પ્રાપ્સ્યતેઽચ્યુતઃ ।
શાન્તિમાન્દેવદેવેશો મધુહન્તા મધુપ્રિયઃ

તેન બુદ્ધસ્વરૂપેણ દેવેન પરમેષ્ઠિના ।
ભવિષ્યતિ જગત્સર્વં મોહિતં સચરાચરમ્

ન શ્રોષ્યન્તિ પિતુઃ પુત્રાસ્તદાપ્રભૃતિ ભારત ।
ન ગુરોર્બાન્ધવાઃ શિષ્યા ભવિષ્યત્યધરોત્તરમ્

જિતો ધર્મો હ્યધર્મેણ ચાસત્યેન ઋતં જિતમ્ ।
જિતાશ્ચૌરૈશ્ચ રાજાનઃ સ્ત્રીભિશ્ચ પુરુષા જિતાઃ

સીદન્તિ ચાગ્નિહોત્રાણિ ગુરૌ પૂજા પ્રણશ્યતિ ।
સીદન્તિ માનવા ધર્માઃ કલૌ પ્રાપ્તે યુધિષ્ઠિર

દ્વાદશે દશમે વર્ષે નારી ગર્ભવતી ભવેત્ ।
કન્યાસ્તત્ર પ્રસૂયન્તે બ્રાહ્મણો હરિપિઙ્ગલઃ

ભવિષ્યતિ તતઃ કલ્કિર્દશમે જન્મનિ પ્રભુઃ

એતત્તે કથિતં રાજન્દેવસ્ય પરમેષ્ઠિનઃ ।
કારણં દશ જન્મનાં સર્વપાપક્ષયંકરમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શ્વેતવારાહતીર્થમાહાત્મ્યવર્ણનં નામૈકપઞ્ચાશદધિકશતતમોઽધ્યાયઃ ॥