સ્કંદ પુરાણ · અધ્યાય 5.143

શ્રીમાર્કણ્ડેય ઉવાચ -
તતો ગચ્છેન્મહારાજ યોજનેશ્વરમુત્તમમ્ ।
યત્ર સિદ્ધૌ પુરા કલ્પે નરનારાયણાવૃષી

તત્ર તીર્થે તપસ્તપ્ત્વા સઙ્ગ્રામે દેવદાનવૈઃ ।
જયં પ્રાપ્તૌ મહાત્માનૌ નરનારાયણાવુભૌ

પુનસ્ત્રેતાયુગે પ્રાપ્તે તૌ દેવૌ રામલક્ષ્મણૌ ।
તત્ર તીર્થે પુનઃ સ્નાત્વા રાવણો દુર્જયો હતઃ

પુનઃ પાર્થ કલૌ પ્રાપ્તે તૌ દેવૌ બલકેશવૌ ।
વસુદેવકુલે જાતૌ દુષ્કરં કર્મ ચક્રતુઃ

નરકં કાલનેમિં ચ કંસં ચાણૂરમુષ્ટિકૌ ।
શિશુપાલં જરાસંધં જઘ્નતુર્બલકેશવૌ

તતસ્તત્ર રિપૂન્સંખ્યે ભીષ્મદ્રોણપુરઃસરાન્ ।
કર્ણદુર્યોધનાદીંશ્ચ નિહનિષ્યતિ સ પ્રભુઃ

ધર્મક્ષેત્રે કુરુક્ષેત્રે તત્ર યુધ્યન્તિ તે ક્ષણમ્ ।
ભીમાર્જુનનિમિત્તેન શિષ્યૌ કૃત્વા પરસ્પરમ્

તત્ર તીર્થે પુનર્ગત્વા તપઃ કૃત્વા સુદુષ્કરમ્ ।
પૂજયિત્વા દ્વિજાન્ભક્ત્યા યાસ્યેતે દ્વારકાં પુનઃ

તત્ર તીર્થે તુ યઃ સ્નાત્વા પૂજયેદ્બલકેશવૌ ।
તેન દેવો જગદ્ધાતા પૂજિતસ્ત્રિગુણાત્મવાન્

ઉપવાસી નરો ભૂત્વા યસ્તુ કુર્યાત્પ્રજાગરમ્ ।
મુચ્યતે સર્વપાપેભ્યો ગાયંસ્તસ્ય શુભાં કથામ્

યાવતસ્તત્ર તીર્થે તુ વૃક્ષાન્ પશ્યન્તિ માનવાઃ ।
બ્રહ્મહત્યાદિકં પાપં તાવદેષાં પ્રણશ્યતિ

પ્રાતરુત્થાય યે કેચિત્પશ્યન્તિ બલકેશવૌ ।
તેનૈવ સદૃશાઃ સર્વે દેવદેવેન ચક્રિણા

તે પૂજ્યાસ્તે નમસ્કાર્યાસ્તેષાં જન્મ સુજીવિતમ્ ।
યે નમન્તિ જગત્પૂજ્યં દેવં નારાયણં હરિમ્

તત્ર તીર્થે તુ યદ્દાનં સ્નાનં દેવાર્ચનં નૃપ ।
ક્રિયતે તત્ફલં સર્વમક્ષયાયોપકલ્પતે

અગ્નેરપત્યં પ્રથમં સુવર્ણં ભૂર્વૈષ્ણવી સૂર્યસુતાશ્ચ ગાવઃ ।
લોકાસ્ત્રયસ્તેન ભવન્તિ દત્તા યઃ કાઞ્ચનં ગાં ચ ભુવં ચ દદ્યાત્

એતત્તે કથિતં સર્વં તીર્થમાહાત્મ્યમુત્તમમ્ ।
અતીતં ચ ભવિષ્યચ્ચ વર્તમાનં મહાબલમ્

શ્રુત્વા વાપિ પઠિત્વેદં શ્રાવયિપત્વાથ ધાર્મિકાન્ ।
મુચ્યતે સર્વપાપેભ્યો નાત્ર કાર્યા વિચારણા

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે યોજનેશ્વરતીર્થમાહાત્મ્યવર્ણનં નામ ત્રિચત્વારિંશદધિકશતતમોઽધ્યાયઃ ॥