સ્કંદ પુરાણ · અધ્યાય 5.140

માર્કણ્ડેય ઉવાચ -
તતો ગચ્છેન્મહારાજ નન્દાહ્રદમનુત્તમમ્ ।
યત્ર સિદ્ધા મહાભાગા નન્દા દેવી વરપ્રદા

મહિષાસુરે મહાકાયે પુરા દેવભયંકરે ।
શૂલિન્યા શૂલભિન્નાઙ્ગે કૃતે દાનવસત્તમે

યેનૈકાદશરુદ્રાશ્ચ હ્યાદિત્યાઃ સમરુદ્ગણાઃ ।
વસવો વાયુના સાર્દ્ધં ચન્દ્રાદિત્યૌ સુરેશ્વર

બલિના નિર્જિતા યેન બ્રહ્મવિષ્ણુમહેશ્વરાઃ ।
સઙ્ગ્રામે સુમહાઘોરે કૃતે દેવભયંકરે

કૃત્વા તત્કદનં ઘોરં નન્દા દેવી સુરેશ્વરી ।
યસ્માત્સ્નાતા વિશાલાક્ષી તેન નન્દાહ્રદઃ સ્મૃતઃ

તત્ર તીર્થે તુ યઃ સ્નાત્વા નન્દામુદ્દિશ્ય ભારત ।
દદાતિ દાનં વિપ્રેભ્યઃ સોઽશ્વમેધફલં લભેત્

ભૈરવં ચૈવ કેદારં તથા રુદ્રં મહાલયમ્ ।
નન્દાહ્રદશ્ચતુર્થઃ સ્યાત્પઞ્ચમં ભુવિ દુર્લભમ્

બહવસ્તં ન જાનન્તિ કામરાગસમન્વિતાઃ ।
નર્મદાયા હ્રદં પુણ્યં સર્વપાતકનાશનમ્

તત્ર તીર્થે તુ યઃ સ્નાત્વા નન્દાં દેવીં પ્રપૂજયેત્ ।
કિં તસ્ય હિમવન્મધ્યગમનેન પ્રયોજનમ્

પરમાર્થમવિજ્ઞાય પર્યટન્તિ તમોવૃતાઃ ।
તેષાં સમાગમે પાર્થ શ્રમ એવ હિ કેવલમ્

પૃથિવ્યાં સાગરાન્તાયાં સ્નાનદાનેન યત્ફલમ્ ।
તત્ફલં સમવાપ્નોતિ સ્નાત્વા નન્દાહ્રદે નૃપ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે નન્દાહ્રદતીર્થમાહાત્મ્યવર્ણનં નામ ચત્વારિંશદધિકશતતમોઽધ્યાયઃ ॥