સ્કંદ પુરાણ · અધ્યાય 5.132

શ્રીમાર્કણ્ડેય ઉવાચ -
તતો ગચ્છેત્તુ રાજેન્દ્ર ઉત્તરે નર્મદાતટે ।
સર્વપાપહરં તીર્થં વારાહં નામ નામતઃ

તત્ર દેવો જગદ્ધાતા વારાહં રૂપમાસ્થિતઃ ।
સ્થિતો લોકહિતાર્થાય સંસારાર્ણવતારકઃ

તત્ર તીર્થે તુ યઃ સ્નાત્વા પૂજયેદ્ધરણીધરમ્ ।
ગન્ધમાલ્યવિશેષૈશ્ચ જયશબ્દાદિમઙ્ગલૈઃ

ઉપવાસપરો ભૂત્વા દ્વાદશ્યાં નૃપસત્તમ ।
વૃષલાઃ પાપકર્માણસ્તથૈવાન્ધપિશાચિનઃ

આલાપાદ્ગાત્રસંપર્કાન્નિઃશ્વાસાત્સહભોજનાત્ ।
પાપં સંક્રમતે યસ્માત્તસ્માત્તાન્ પરિવર્જયેત્

બ્રાહ્મણાન્ પૂજયેદ્ભક્ત્યા યથાશક્ત્યા યથાવિધિ ।
રાત્રૌ જાગરણં કાર્યં કથાયાં તત્ર ભારત

પ્રભાતે વિમલે સ્નાત્વા તત્ર તીર્થે જગદ્ગુરુમ્ ।
યે પશ્યન્તિ જિતક્રોધાસ્તે મુક્તાઃ સર્વપાતકૈઃ

યથા તુ દૃષ્ટ્વા ભુજગાઃ સુપર્ણં નશ્યન્તિ મુક્ત્વા વિષમુગ્રતેજઃ ।
નશ્યન્તિ પાપાનિ તથૈવ શીઘ્રં દૃષ્ટ્વા મુખં શૂકરરૂપિણસ્તુ

નભોગતં નશ્યતિ ચાન્ધકારં દૃષ્ટ્વા રવિં દેવવરં તથૈવ ।
નશ્યન્તિ પાપાનિ સુદુસ્તરાણિ દૃષ્ટ્વા મુખં પાર્થ ધરાધરસ્ય

કિં તસ્ય બહુભિર્મન્ત્રૈર્ભક્તિર્યસ્ય જનાર્દને ।
નમો નારાયણાયેતિ મન્ત્રઃ સર્વાર્થસાધકઃ

એકોઽપિ કૃષ્ણસ્ય કૃતઃ પ્રણામો દશાશ્વમેધાવભૃથેન તુલ્યઃ ।
દશાશ્વમેધી પુનરેતિ જન્મ કૃષ્ણપ્રણામી ન પુનર્ભવાય

ધ્યાયમાના મહાત્માનો રૂપં નારાયણં હરેઃ ।
યે ત્યજન્તિ સ્વકં દેહં તત્ર તીર્થે જિતેન્દ્રિયાઃ

તે ગચ્છન્ત્યમલં સ્થાનં યત્સુરૈરપિ દુર્લભમ્ ।
ક્ષરાક્ષરવિનિર્મુક્તં તદ્વિષ્ણોઃ પરમં પદમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે આદિવારાહતીર્થમાહાત્મ્યવર્ણનં નામ દ્વાત્રિંશદધિકશતતમોઽધ્યાયઃ ॥