સ્કંદ પુરાણ · અધ્યાય 5.115

શ્રીમાર્કણ્ડેય ઉવાચ -
તતો ગચ્છેન્મહારાજ તીર્થમઙ્ગારકં પરમ્ ।
રૂપદં સર્વલોકાનાં વિશ્રુતં નર્મદાતટે

અઙ્ગારકેણ રાજેન્દ્ર પુરા તપ્તં તપઃ કિલ ।
અર્બુદં ચ નિખર્વં ચ પ્રયુતં વર્ષસંખ્યયા

તતસ્તુષ્ટો મહાદેવઃ પરયા કૃપયા નૃપ ।
પ્રત્યક્ષદર્શી ભગવાનુવાચ ક્ષિતિનન્દનમ્

વરદોઽસ્મિ મહાભાગ દુર્લભં ત્રિદશૈરપિ ।
વરં દાસ્યામ્યહં વત્સ બ્રૂહિ યત્તે વિવક્ષિતમ્

અઙ્ગારક ઉવાચ -
તવ પ્રસાદાદ્દેવેશ સર્વલોકમહેશ્વર ।
ગ્રહમધ્યગતો નિત્યં વિચરામિ નભસ્તલે

યાવદ્ધરાધરો લોકે યાવચ્ચન્દ્રદિવાકરૌ ।
નદ્યો નદાઃ સમુદ્રાશ્ચ વરો મે ચાક્ષયો ભવેત્

એવમસ્ત્વિતિ દેવેશો દત્ત્વા વરમનુત્તમમ્ ।
જગામાકાશમાવિશ્ય વન્દ્યમાનઃ સુરાસુરૈઃ

ભૂમિપુત્રસ્તતસ્તસ્મિન્સ્થાપયામાસ શઙ્કરમ્ ।
ગતઃ સુરાલયે લોકે ગ્રહભાવે નિવેશિતઃ

તત્ર તીર્થે તુ યઃ સ્નાત્વા પૂજયેત્પરમેશ્વરમ્ ।
હુતહોમો જિતક્રોધઃ સોઽશ્વમેધફલં લભેત્

ચતુર્થ્યઙ્ગારકે યસ્તુ સ્નાત્વા ચાભ્યર્ચયેદ્ગ્રહમ્ ।
અઙ્ગારકં વિધાનેન સપ્તજન્માનિ ભારત

દશયોજનવિસ્તીર્ણે મણ્ડલે રૂપવાન્ ભવેત્ ।
તત્રૈવ તા મૃતો જન્તુઃ કામતોઽકામતોઽપિ વા ।
રુદ્રસ્યાનુચરો ભૂત્વા તેનૈવ સહ મોદતે

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે અઙ્ગારકતીર્થમાહાત્મ્યવર્ણનં નામ પઞ્ચદશોત્તરશતતમોઽધ્યાયઃ ॥