શિવસ્તુતિ · શ્લોક 1-10

શ્રીલઙ્કેશ્વરવિરચિતા શિવસ્તુતિઃ ।
ગલે કલિતકાલિમ પ્રકટિતેન્દુ ભાલસ્થલે વિનાટિતજટોત્કરં રુચિરપાણિપાથોરુહે ।
ઉદઞ્ચિતકપાલકં જઘનસીમ્નિ સંદર્શિતદ્વિપાજિનમનુક્ષણં કિમપિ ધામ વન્દામહે

વૃષોપરિપરિસ્ફુરદ્ધવલધામ ધામશ્રિયાકુબેરગિરિગૌરિમપ્રભવગર્વનિર્વાસિ તત્ ।
રુચિરપુનરુમાકુચોપચિતકુઙ્કુમૈ રઞ્જિતં ગજાજિનવિરાજિતં વૃજિનભઙ્ગબીજં ભજે

ઉદિત્વરવિલોચનત્રયવિસૃત્વરજ્યોતિષા કલાકરકલાકરવ્યતિકરેણ ચાહર્નિશમ્ ।
વિકાસિતજટાટવીવિહરણોત્સવપ્રોલ્લસત્તરામરતરઙ્ગિણીતરલચૂડમીડે મૃડમ્

વિહાય કમલાલયાવિલસિતાનિ વિદ્યુન્નટીવિડમ્બનપટૂનિ મે વિહરણં વિધત્તાં મનઃ ।
કપર્દિનિ કુમુદ્વતીરમણખણ્ડચૂડામણૌ કટીતટપટીભવત્કરટિચર્મણિ બ્રહ્મણિ

ભવદ્ભવનદેહલીવિકટાતુણ્ડદણ્ડાહતિત્રુટન્મુકુટકોટિભિર્મઘવદાદિભિર્ભૂયતે ।
વ્રજેમ ભવદન્તિકં પ્રકૃતિમેત્ય પૈશાચિકીં કિમિત્યમરસંપદઃ પ્રમથનાથ નાથામ હે

ત્વદર્ચનપરાયણપ્રમથકન્યકાલુણ્ઠિતપ્રસૂનસફલદ્રુમં કમપિ શૈલમાશાસ્મહે ।
અલં તટવિતર્દિકાશયિતસિદ્ધસીમન્તિનીપ્રકીર્ણસુમનોમનોરનમેરુણા મેરુણા

ન જાતુ હર યાતુ મે વિષયદુર્વિલાસં મનો મનોભવકથાસ્તુ મે ન ચ મનોરથાતિથ્યભૂઃ ।
સ્ફુરત્સુરતરઙ્ગિણીતટકુટીરકોટૌ વસન્નયે શિવ દેવાનિશં તવ ભવાનિ પૂજાપરઃ

વિભૂષણસુરાપગાશુચિતરાલવાલાવલીવલદ્બહલસીકરપ્રકરસેકસંવર્ધિતા ।
મહેશ્વરસુરદ્રુમસ્ફુરિતસજ્જટામઞ્જરી નમજ્જનફલપ્રદા મમ નુ હન્ત ભૂયાદિયમ્

બહિર્વિષયસંગતિપ્રતિનિવર્તિતાક્ષાવલેઃ સમાધિકલિતાત્મનઃ પશુપતેરશેષાત્મનઃ ।
શિરઃસુરસરિત્તટીકુટિલકલ્પકલ્પદ્રુમં નિશાકરકલામહં વટુવિમૃષ્યમાણાં ભજે

ત્વદીયસુરવાહિનીવિમલવારિધારાવલજ્જટાગહનગાહિની મતિરિયં મમાક્રામતુ ।
ઉપોત્તમસરિત્તટીવિટપિતાટવીપ્રોલ્લસત્તપસ્વિપરિષત્તુલામમલમલ્લિકાભ પ્રભો