શિક્ષાષ્ટકમ્ · અધ્યાય 1

રચયિતા- ચૈતન્ય મહાપ્રભુ (૧૪૮૬-૧૫૩૪)
ચેતોદર્પણમાર્જનં ભવમહાદાવાગ્નિનિર્વાપણમ્ શ્રેયઃ કૈરવચન્દ્રિકાવિતરણં વિદ્યાવધૂ જીવનમ્ ।
આનંદામ્બુધિવર્ધનં પ્રતિપદં પૂર્ણામૃતાસ્વાદનમ્ સર્વાત્મસ્નપનં પરં વિજયતે શ્રીકૃષ્ણ સંકીર્તનમ્

નામ્નામકારિ બહુધા નિજ સર્વ શક્તિ-સ્તત્રાર્પિતા નિયમિતઃ સ્મરણે ન કાલઃ।
એતાદૃશી તવ કૃપા ભગવન્મમાપિ દુર્દૈવમીદૃશમિહાજનિ નાનુરાગઃ

તૃણાદપિ સુનીચેન તરોરપિ સહિષ્ણુના।
અમાનિના માનદેન કીર્તનીયઃ સદા હરિઃ

ન ધનં ન જનં ન સુન્દરીં કવિતાં વા જગદીશ કામયે।
મમ જન્મનિ જન્મનીશ્વરે ભવતાદ્ ભક્તિરહૈતુકી ત્વયિ

અયિ નન્દતનુજ કિંકરં પતિતં માં વિષમે ભવામ્બુધૌ।
કૃપયા તવ પાદપંકજ-સ્થિતધૂલિસદૃશં વિચિન્તય

નયનં ગલદશ્રુધારયા વદનં ગદગદરુદ્ધયા ગિરા।
પુલકૈર્નિચિતં વપુઃ કદા તવ નામ-ગ્રહણે ભવિષ્યતિ

યુગાયિતં નિમેષેણ ચક્ષુષા પ્રાવૃષાયિતમ્ ।
શૂન્યાયિતં જગત્ સર્વં ગોવિન્દ વિરહેણ મે

આશ્લિષ્ય વા પાદરતાં પિનષ્ટુ મા-મદર્શનાન્મર્મહતાં કરોતુ વા।
યથા તથા વા વિદધાતુ લમ્પટો મત્પ્રાણનાથસ્તુ સ એવ નાપરઃ