શિવ પુરાણ · અધ્યાય 7.26

ઉપમન્યુરુવાચ
બ્રહ્મઘ્નો વા સુરાપો વા સ્તેયીવા ગુરુતલ્પગઃ

માતૃહા પિતૃહા વાપિ વીરહા ભ્રૂણહાપિ વા

સંપૂજ્યામન્ત્રકં ભક્ત્યા શિવં પરમકારણમ્

તૈસ્તૈઃ પાપૈઃ પ્રમુચ્યેત વર્ષૈર્દ્વાદશભિઃ ક્રમાત્

તસ્માત્સર્વપ્રયત્નેન પતિતો ઽપિ યજેચ્છિવમ્

ભક્તશ્ચેન્નાપરઃ કશ્ચિદ્ભિક્ષાહારો જિતેંદ્રિયઃ

કૃત્વાપિ સુમહત્પાપં ભક્ત્યા પઞ્ચાક્ષરેણ તુ

પૂજયેદ્યદિ દેવેશં તસ્માત્પાપાત્પ્રમુચ્યતે

અબ્ભક્ષા વાયુભક્ષાશ્ચ યે ચાન્યે વ્રતકર્શિતાઃ

તેષામેતૈર્વ્રતૈર્નાસ્તિ શિવલોકસમાગમઃ

ભક્ત્યા પઞ્ચાક્ષરેણૈવ યઃ શિવં સકૃદર્ચયેત્

સોપિ ગચ્છેચ્છિવસ્થાનં શિવમન્ત્રસ્ય ગૌરવાત્

તસ્માત્તપાંસિ યજ્ઞાંશ્ચ સર્વે સર્વસ્વદક્ષિણાઃ

શિવમૂર્ત્યર્ચનસ્યૈતે કોટ્યંશેનાપિ નો સમાઃ

બદ્ધો વાપ્યથ મુક્તો વા પશ્ચાત્પઞ્ચાક્ષરેણ ચેત્

પૂજયન્મુચ્યતે ભક્તો નાત્ર કાર્યા વિચારણા

અરુદ્રો વા સરુદ્રો વા સૂક્તેન શિવમર્ચયેત્

યઃ સકૃત્પતિતો વાપિમૂઢો વા મુચ્યતે નરઃ

ષડક્ષરેણ વા દેવં સૂક્તમન્ત્રેણ પૂજયેત્

શિવભક્તો જિતક્રોધો હ્યલબ્ધો લબ્ધ એવ ચ

અલબ્ધાલ્લબ્ધ એવાત્ર વિશિષ્ટો નાત્ર સંશયઃ

સ બ્રહ્માંગેન વા તેન સહંસેન વિમુચ્યતે

તસ્માન્નિત્યં શિવં ભક્ત્યા સૂક્તમન્ત્રેણ પૂજયેત્

એકકાલં દ્વિકાલં વા ત્રિકાલં નિત્યમેવ વા

યે ઽર્ચયંતિ મહાદેવં વિજ્ઞેયાસ્તે મહેશ્વરાઃ

જ્ઞાનેનાત્મસહાયેન નાર્ચિતો ભગવાઞ્છિવઃ

સ ચિરં સંસરત્યસ્મિન્સંસારે દુઃખસાગરે

દુર્લ્લભં પ્રાપ્ય માનુષ્યં મૂઢો નાર્ચયતે શિવમ્

નિષ્ફલં તસ્ય તજ્જન્મ મોક્ષાય ન ભવેદ્યતઃ

દુર્લ્લભં પ્રાપ્ય માનુષ્યં યે ઽર્ચયન્તિ પિનાકિનમ્

તેષાં હિ સફલં જન્મ કૃતાર્થાસ્તે નરોત્તમાઃ

ભવભક્તિપરા યે ચ ભવપ્રણતચેતસઃ

ભવસંસ્મરણોદ્યુક્તા ન તે દુઃખસ્ય ભાગિનઃ

ભવનાનિ મનોજ્ઞાનિ વિભ્રમાભરણાઃ સ્ત્રિયઃ

ધનં ચાતૃપ્તિપર્યન્તં શિવપૂજાવિધેઃ ફલમ્

યે વાઞ્છન્તિ મહાભોગાન્રાજ્યં ચ ત્રિદશાલયે

તે વાઞ્છન્તિ સદાકાલં હરસ્ય ચરણામ્બુજમ્

સૌભાગ્યં કાન્તિમદ્રૂપં સત્ત્વં ત્યાગાર્દ્રભાવતા

શૌર્યં વૈ જગતિ ખ્યાતિશ્શિવમર્ચયતો ભવેત્

તસ્માત્સર્વં પરિત્યજ્ય શિવૈકાહિતમાનસઃ

શિવપૂજાવિધિં કુર્યાદ્યદીચ્છેચ્છિવમાત્મનઃ

ત્વરિતં જીવિતં યાતિ ત્વરિતં યાતિ યૌવનમ્

ત્વરિતં વ્યાધિરભ્યેતિ તસ્માત્પૂજ્યઃ પિનાકધૃક્

યાવન્નાયાતિ મરણં યાવન્નાક્રમતે જરા

યાવન્નેન્દ્રિયવૈકલ્યં તાવત્પૂજય શંકરમ્

ન શિવાર્ચનતુલ્યો ઽસ્તિ ધર્મો ઽન્યો ભુવનત્રયે

ઇતિ વિજ્ઞાય યત્નેન પૂજનીયસ્સદાશિવઃ

દ્વારયાગં જવનિકાં પરિવારબલિક્રિયામ્

નિત્યોત્સવં ચ કુર્વીત પ્રસાદે યદિ પૂજયેત્

હવિર્નિવેદનાદૂર્ધ્વં સ્વયં ચાનુચરો ઽપિ વા

પ્રસાદપરિવારેભ્યો બલિં દદ્યાદ્યથાક્રમમ્

નિર્ગમ્ય સહ વાદિત્રૈસ્તદાશાભિમુખઃ સ્થિતઃ

પુષ્પં ધૂપં ચ દીપઞ્ચ દદ્યાદન્નં જલૈઃ સહ

તતો દદ્યાન્મહાપીઠે તિષ્ઠન્બલિમુદઙ્મુખઃ

તતો નિવેદિતં દેવે યત્તદન્નાદિકં પુરા

તત્સર્વં સાવશેષં વા ચણ્ડાય વિનિવેદયેત્

હુત્વા ચ વિધિવત્પશ્ચાત્પૂજાશેષં સમાપયેત્

કૃત્વા પ્રયોગં વિધિવદ્યાવન્મન્ત્રં જપં તતઃ

નિત્યોત્સવં પ્રકુર્વીત યથોક્તં શિવશાસને

વિપુલે તૈજસે પાત્રે રક્તપદ્મોપશોભિતે

અસ્ત્રં પાશુપતં દિવ્યં તત્રાવાહ્ય સમર્ચયેત્

શિવસ્યારોપ્યઃ તત્પાત્રં દ્વિજસ્યાલંકૃતસ્ય ચ

ન્યસ્તાસ્ત્રવપુષા તેન દીપ્તયષ્ટિધરસ્ય ચ

પ્રાસાદપરિવારેભ્યો બહિર્મંગલનિઃસ્વનૈઃ

નૃત્યગેયાદિભિશ્ચૈવ સહ દીપધ્વજાદિભિઃ

પ્રદક્ષિણત્રયં કૃત્વા ન દ્રુતં ચાવિલમ્બિતમ્

મહાપીઠં સમાવૃત્ય ત્રિઃપ્રદક્ષિણયોગતઃ

પુનઃ પ્રવિષ્ટો દ્વારસ્થો યજમાનઃ કૃતાઞ્જલિઃ

આદાયાભ્યંતરં નીત્વા હ્યસ્ત્રમુદ્વાસયેત્તતઃ

પ્રદક્ષિણાદિકં કૃત્વા યથાપૂર્વોદિતં ક્રમાત્

આદાય ચાષ્ટપુષ્પાણિ પૂજામથ સમાપયેત્

ઇતિ શ્રીશિવમહાપુરાણે સપ્તમ્યાં વાયવીયસંહિતાયામુત્તરખણ્ડે સાંગોપાંગપૂજાવિધાનવર્ણનં નામ ષડ્વિંશો ઽધ્યાયઃ