શતપથબ્રાહ્મણમ્ · અધ્યાય 14.6.5

ઉષસ્તબ્રાહ્મણં વા નિર્ગુણાત્મવિદ્યાબ્રાહ્મણમ્
અથ હૈનમુષસ્તશ્ચાક્રાયણઃ પપ્રચ્છ। યાજ્ઞવલ્ક્યેતિ હોવાચ યત્સાક્ષાદપરોક્ષાદ્બ્રહ્મ ય આત્મા સર્વાન્તરસ્તં મે વ્યાચક્ષ્વેત્યેષ ત આત્મા સર્વાન્તરઃ કતમો યાજ્ઞવલ્ક્ય સર્વાન્તરો યઃ પ્રાણેન પ્રાણિતિ સ ત આત્મા સર્વાન્તરો યોઽપાનેનાપાનિતિ સ ત આત્મા સર્વાન્તરો યો વ્યાનેન વ્યનિતિ સ ત આત્મા સર્વાન્તરો ય ઉદાનેનોદનિતિ સ ત આત્મા સર્વાન્તરો યઃ સમાનેન સમનિતિ સ ત આત્મા સર્વાન્તરઃ સ હોવાચોષસ્તશ્ચાક્રાયણો યથા વૈ બ્રૂયાદસૌ ગૌરસાવશ્વ ઇત્યેવમેવૈતદ્વ્યપદિષ્ટં ભવતિ યદેવ સાક્ષાદપરોક્ષાદ્બ્રહ્મ ય આત્મા સર્વાન્તરસ્તં મે વ્યાચક્ષ્વેત્યેષ ત આત્મા સર્વાન્તરઃ કતમો યાજ્ઞવલ્ક્ય સર્વાન્તરો ન દૃષ્ટેર્દ્રષ્ટારં પશ્યેર્ન શ્રુતેઃ શ્રોતારં શૃણુયા ન મતેર્મન્તારમ્મન્વીથા ન વિજ્ઞાતેર્વિજ્ઞાતારં વિજાનીયા એષ ત આત્મા સર્વાન્તરોઽતોઽન્યદાર્તં તતો હોષસ્તશ્ચાક્રાયણ ઉપરરામ - ૧૪.૬.૫