શતપથબ્રાહ્મણમ્ · અધ્યાય 13.3.6

અશ્વસ્ય વા આલબ્ધસ્ય મેધ ઉદક્રામત્તદશ્વસ્તોમીયમભવદ્યદશ્વસ્તોમીયં જુહોત્યશ્વમેવ મેધસા સમર્ધયતિ -

આજ્યેન જુહોતિ મેધો વા આજ્યં મેધોઽશ્વસ્તોમીયં મેધસૈવાસ્મિંસ્તન્મેધો દધાત્યાજ્યેન જુહોત્યેતદ્વૈ દેવાનાં પ્રિયં ધામ યદાજ્યં પ્રિયેણૈવૈનાન્ધામ્ના સમર્ધયતિ -

અશ્વસ્તોમીયં હુત્વા દ્વિપદા જુહોતિ અશ્વો વા અશ્વસ્તોમીયં પુરુષો દ્વિપદા દ્વિપાદ્વૈ પુરુષો દ્વિપ્રતિષ્ઠસ્તદેનં પ્રતિષ્ઠયા સમર્ધયતિ -

તદાહુઃ અશ્વસ્તોમીયં પૂર્વં હોતવ્યાં૩ દ્વિપદા૩ ઇતિ પશવો વા અશ્વસ્તોમીયમ્પુરુષો દ્વિપદા યદશ્વસ્તોમીયં હુત્વા દ્વિપદા જુહોતિ તસ્માત્પુરુષ ઉપરિષ્ટાત્પશૂનધિતિષ્ઠતિ -

ષોડશાશ્વસ્તોમીયા જુહોતિ ષોડશકલા વૈ પશવઃ સા પશૂનાં માત્રા પશૂનેવ માત્રયા સમર્ધયતિ યત્કનીયસીર્વા ભૂયસીર્વા જુહુયાત્પશૂન્માત્રયા વ્યર્ધયેત્ષોડશ જુહોતિ ષોડશકલા વૈ પશવઃ સા પશૂનાં માત્રા પશૂનેવ માત્રયા સમર્ધયતિ નાન્યામુત્તમામાહુતિં જુહોતિ યદન્યામુત્તમામાહુતિં જુહુયાત્પ્રતિષ્ઠાયૈ ચ્યવેત દ્વિપદા ઉત્તમા જુહોતિ પ્રતિષ્ઠા વૈ દ્વિપદાઃ પ્રત્યેવ તિષ્ઠતિ જુમ્બકાય સ્વાહેત્યવભૃથ ઉત્તમામાહુતિં જુહોતિ વરુણો વૈ જુમ્બકઃ સાક્ષાદેવ વરુણમવયજતે શુક્લસ્ય ખલતેર્વિક્લિધસ્ય પિઙ્ગાક્ષસ્ય મૂર્ધનિ જુહોત્યેતદ્વૈ વરુણસ્ય રૂપં રૂપેણૈવ વરુણમવયજતે -

દ્વાદશ બ્રહ્મૌદનાનુત્થાય નિર્વપતિ દ્વાદશભિર્વેષ્ટિભિર્યજતે તદાહુર્યજ્ઞસ્ય વા એતદ્રૂપં યદિષ્ટયો યદિષ્ટિભિર્યજેતોપનામુક એનં યજ્ઞઃ સ્યાત્પાપીયાંસ્તુ સ્યાદ્યાતયામાનિ વા એતદીજાનસ્ય છન્દાંસિ ભવન્તિ તાનિ કિમેતાવદાશુ પ્રયુઞ્જીત સર્વા વૈ સંસ્થિતે યજ્ઞે વાગાપ્યતે સાત્રાપ્તા યાતયામ્ની ભવતિ ક્રૂરીકૃતેવ હિ ભવત્યરુષ્કૃતા વાગ્વૈ યજ્ઞસ્તસ્માન્ન પ્રયુઞ્જીતેતિ -

દ્વાદશૈવ બ્રહ્મૌદનાનુત્થાય નિર્વપેત્ પ્રજાપતિર્વા ઓદનઃ પ્રજાપતિઃ સંવત્સરઃ પ્રજાપતિર્યજ્ઞઃ સંવત્સરમેવ યજ્ઞમાપ્નોત્યુપનામુક એનં યજ્ઞો ભવતિ ન પાપીયાન્ભવતિ -