શતપથબ્રાહ્મણમ્ · અધ્યાય 13.1.9

આ બ્રહ્મન્ બ્રાહ્મણો બ્રહ્મવર્ચસી જાયતામિતિ બ્રાહ્મણ એવ બ્રહ્મવર્ચસં દધાતિ તસ્માત્પુરા બ્રાહ્મણો બ્રહ્મવર્ચસી જજ્ઞે -

આ રાષ્ટ્રે રાજન્યઃ શૂર ઇષવ્યોઽતિવ્યાધી મહારથો જાયતામિતિ રાજન્ય એવ શૌર્યમ્
મહિમાનં દધાતિ તસ્માત્પુરા રાજન્યઃ શૂર ઇષવ્યોઽતિવ્યાધી મહારથો જજ્ઞે -

દોગ્ધ્રી ધેનુરિતિ ધેન્વામેવ પયો દધાતિ તસ્માત્પુરા ધેનુર્દોગ્ધ્રી જજ્ઞે -

વોઢાનડ્વાનિતિ અનડુહ્યેવ બલં દધાતિ તસ્માત્પુરાનડ્વાન્વોઢા જજ્ઞે -

આશુઃ સપ્તિરિતિ અશ્વ એવ જવં દધાતિ તસ્માત્પુરાશ્વઃ સર્તા જજ્ઞે -

પુરંધિર્યોષેતિ યોષિત્યેવ રૂપં દધાતિ તસ્માદ્રૂપિણી યુવતિઃ પ્રિયા ભાવુકા -

જિષ્ણૂ રથેષ્ઠા ઇતિ રાજન્ય એવ જૈત્રં મહિમાનં દધાતિ તસ્માત્પુરા રાજન્યો જિષ્ણુર્જજ્ઞે -

સભેયો યુવેતિ એષ વૈ સભેયો યુવા યઃ પ્રથમવયસી તસ્માત્પ્રથમવયસી સ્ત્રીણાં પ્રિયો ભાવુકઃ -

આસ્ય યજમાનસ્ય વીરો જાયતામિતિ યજમાનસ્યૈવ પ્રજાયાં વીર્યં દધાતિ તસ્માત્પુરેજાનસ્ય વીરો જજ્ઞે -

નિકામે નઃ પર્જન્યો વર્ષત્વિતિ નિકામેનિકામે વૈ તત્ર પર્જન્યો વર્ષતિ યત્રૈતેન યજ્ઞેન યજન્તે ફલવત્યો ન ઓષધયઃ પચ્યન્તામિતિ ફલવત્યો વૈ તત્રૌષધયઃ પચ્યન્તે યત્રૈતેન યજ્ઞેન યજન્તે યોગક્ષેમો નઃ કલ્પતામિતિ યોગક્ષેમો વૈ તત્ર કલ્પતે યત્રૈતેન યજ્ઞેન યજન્તે તસ્માદ્યત્રૈતેન યજ્ઞેન યજન્તે કૢપ્તઃ પ્રજાનાં યોગક્ષેમો ભવતિ -