શતપથબ્રાહ્મણમ્ · અધ્યાય 11.7.4

સ યત્પશુના યક્ષ્યમાણઃ। એકારત્નિં યૂપં કુરુત ઇમમેવ તેન લોકં જયત્યથ યદ્દ્વ્યરત્નિમન્તરિક્ષલોકમેવ તેન જયત્યથ યત્ત્ર્યરત્નિં દિવમેવ તેન જયત્યથ યચ્ચતુરત્નિં દિશ એવ તેન જયતિ સ વા એષ ત્ર્યરત્નિર્વૈવ ચતુરરત્નિર્વા પશુબન્ધયૂપો ભવત્યથ યોઽત ઊર્ધ્વઃ સૌમ્યસ્યૈવ સોઽધ્વરસ્ય -

તદાહુઃ। યજેદાજ્યભાગૌ ના૩ ઇતિ યજેદિત્યાહુશ્ચક્ષુષી વા એતે યજ્ઞસ્ય યદાજ્યભાગૌ
કિમૃતે પુરુષશ્ચક્ષુર્ભ્યાં સ્યાદિતિ યાવદ્વૈ ભાગિનં સ્વેન ભાગધેયેન ન નિર્ભજન્ત્યનિર્ભક્તો વૈ સ તાવન્મન્યતેઽથ યદૈવ તં સ્વેન ભાગધેયેન નિર્ભજન્ત્યથૈવ સ નિર્ભક્તો મન્યતે સ યત્રૈતદ્ધોતાઽન્વાહાસ્ના રક્ષઃ સંસૃજતાદિતિ તદેનં સ્વેન ભાગધેયેન નિર્ભજતિ -

એતદ્વૈ પશોઃ સંજ્ઞપ્યમાનસ્ય। હૃદયં શુક્સમવૈતિ હૃદયાચ્છૂલં તદ્યે સહ હૃદયેન પશું શ્રપયન્તિ પુનઃ પશું શુગનુવિષ્યન્દેત પાર્શ્વત એવૈનત્કાષ્ઠે પ્રતૃદ્ય શ્રપયેત્ -

ઉપસ્તૃણીત આજ્યમ્। તત્પૃથિવ્યૈ રૂપં કરોતિ હિરણ્યશકલમવદધાતિ તદગ્ને રૂપંકરોતિ વપામવદધાતિ તદન્તરિક્ષસ્ય રૂપં કરોતિ હિરણ્યશકલમવદધાતિ તદાદિત્યસ્ય રૂપં કરોત્યથ યદુપરિષ્ટાદભિઘારયતિ તદ્દિવો રૂપં કરોતિ સા વા એષા પઞ્ચાવત્તા વપા ભવતિ પાઙ્ક્તો યજ્ઞઃ પાઙ્ક્તઃ પશુઃ પઞ્ચર્તવઃ સંવત્સરસ્ય તસ્માત્પઞ્ચાવત્તા વપા ભવતિ -