શતપથબ્રાહ્મણમ્ · અધ્યાય 11.3.1

૧૧.૩.૧
વાગ્ઘ વા એતસ્યાગ્નિહોત્રસ્યાગ્નિહોત્રી। મન એવ વત્સસ્તદિદં મનશ્ચ વાક્ચ સમાનમેવ સન્નાનેવ તસ્માત્સમાન્યા રજ્જ્વા વત્સં ચ માતરં ચાભિદધતિ તેજ એવ શ્રદ્ધા સત્યમાજ્યમ્ - ૧૧.૩.૧.
તદ્ધૈતજ્જનકો વૈદેહઃ યાજ્ઞવલ્ક્યં પપ્રચ્છ। વેત્થાગ્નિહોત્રં યાજ્ઞવલ્ક્યા૩ ઇતિ વેદ સમ્રાડિતિ કિમિતિ પય એવેતિ - ૧૧.૩.૧.
યત્પયો ન સ્યાત્। કેન જુહુયા ઇતિ વ્રીહિયવાભ્યામિતિ યદ્વ્રીહિયવૌ ન સ્યાતાં કેન
જુહુયા ઇતિ યા અન્યા ઓષધય ઇતિ યદન્યા ઓષધયો ન સ્યુઃ કેન જુહુયા ઇતિ યા આરણ્યા ઓષધય ઇતિ યદારણ્યા ઓષધયો ન સ્યુઃ કેન જુહુયા ઇતિ વાનસ્પત્યેનેતિ યદ્વાનસ્પત્યં ન સ્યાત્કેન જુહુયા ઇત્યદ્ભિરિતિ યદાપો ન સ્યુઃ કેન જુહુયા ઇતિ - ૧૧.૩.૧.
સ હોવાચ। ન વા ઇહ તર્હિ કિં ચનાસીદથૈતદહૂયતૈવ સત્યં શ્રદ્ધાયામિતિ વેત્થાગ્નિહોત્રં યાજ્ઞવલ્ક્ય ધેનુશતં દદામીતિ હોવાચ - ૧૧.૩.૧.
તદપ્યેતે શ્લોકાઃ। કિં સ્વિદ્વિદ્વાન્પ્રવસત્યગ્નિહોત્રી ગૃહેભ્યઃ કથં સ્વિદસ્ય કાવ્યં કથં સંતતો અગ્નિભિરિતિ કથં સ્વિદસ્યાનપપ્રોષિતં ભવતીત્યેવૈતદાહ - ૧૧.૩.૧.
યો જવિષ્ઠો ભુવનેષુ। સ વિદ્વાન્પ્રવસન્વિદે તથા તદસ્ય કાવ્યં તથા સંતતો અગ્નિભિરિતિ મન એવૈતદાહ મનસૈવાસ્યાનપપ્રોષિતં ભવતીતિ - ૧૧.૩.૧.
યત્સ દૂરં પરેત્ય। અથ તત્ર પ્રમાદ્યતિ કસ્મિન્ત્સાસ્ય હુતાઽઽહુતિર્ગૃહે યામસ્ય જુહ્વતીતિ યત્સ દૂરં પરેત્યાથ તત્ર પ્રમાદ્યતિ કસ્મિન્નસ્ય સાઽઽહુતિર્હુતા ભવતીત્યેવૈતદાહ - ૧૧.૩.૧.
યો જાગાર ભુવનેષુ। વિશ્વા જાતાનિ યોઽબિભઃ। તસ્મિન્ત્સાઽસ્ય હુતાઽઽહુતિર્ગૃહે યામસ્ય જુહ્વતીતિ પ્રાણમેવૈતદાહ તસ્માદાહુઃ પ્રાણ એવાગ્નિહોત્રમિતિ - ૧૧.૩.૧.