શાક્તવિજ્ઞાન · ભાગ 12

સ્થાનં પ્રવેશો રૂપં ચ લક્ષં લક્ષણમેવ ચ ।
ઉત્થાપનં બોધનં ચ ચક્રવિશ્રામમેવ ચ ॥ સોમ્સ્વ્_1
ભૂમિકાગમનં ચૈવ અન્તાવસ્થા તથૈવ ચ ।
વિશ્રામઃ પરિણામશ્ચ તથાગમનમેવ ચ ॥ સોમ્સ્વ્_2
ઇતિ ત્રયોદશવિધં શાક્તં વિજ્ઞાનમુત્તમમ્ ।
સર્વેષુ ત્રિકશાસ્ત્રેષુ સૂચિતં શમ્ભુના સ્વયમ્ ॥ સોમ્સ્વ્_3
નાભ્યધો ઽઙ્ગુલાઃ પઞ્ચ મેઢ્રસ્યોર્ધ્વાઙ્ગુલદ્વયમ્ ।
તન્મધ્યે કન્દનામા ચ ચક્રસ્થાનમિતિ સ્મૃતમ્ ॥ સોમ્સ્વ્_4
પ્રાણાપાનનિરોધેન મનસ્તત્રૈવ નિઃક્ષિપેત્ ।
સમ્યગ્ વાયુગતિં જિત્વા યાવન્ મધ્યગતાં નયેત્ ॥ સોમ્સ્વ્_5
એષ પ્રવેશ ઇત્ય્ આહૂ રૂપં વક્ષ્યામિ ચાધુના ।
શૃઙ્ગાટકનિભં ચક્રં ષડરં ચાપરં ધ્રુવમ્ ॥ સોમ્સ્વ્_6
દાડિમીકુસુમપ્રખ્યં કન્દં વૈ જાતિલોહિતમ્ ।
એતદ્રૂપં સમાખ્યાતં તૃતીયં ચિન્તનાત્મકમ્ ॥ સોમ્સ્વ્_7
તન્મધ્યે નિક્ષિપેચ્ ચિત્તં યાવત્ તત્ર સ્થિરીકૃતમ્ ।
ત્યક્તરુદ્ધો યદા વાયુસ્તદા લક્ષં વિનિર્દિશેત્ ॥ સોમ્સ્વ્_8
કન્દચક્રસ્ય મધ્યસ્થા ત્વ્ અનાહતમયી કલા ।
અધઊર્ધ્વે રેખાસંયુક્તા ભુજંગકુટિલાકૃતિઃ ॥ સોમ્સ્વ્_9
ઊર્ધ્વાધો ઽવસ્થિતાવસ્થા સૂર્યાચન્દ્રમસાવ્ ઉભૌ ।
સત્યં વિરાજમાના સા સહસ્રાર્કસમપ્રભા ॥ સોમ્સ્વ્_10
તામેવાલોકયેચ્ છક્તિં મનાક્ કુમ્ભકવૃત્તિના ।
એતલ્ લક્ષણમ્ ઉદ્દિષ્ટમ્ ઉત્થાપનમ્ અતઃ પરમ્ ॥ સોમ્સ્વ્_11
જુષદ્રેચકવૃત્ત્યા તુ મન્ત્રં ચૈવ સમુચ્ચરેત્ ।
પ્રબુદ્ધાં ચિન્તયેચ્છક્તિં દણ્ડવત્ પરમેશ્વરીમ્ ॥ સોમ્સ્વ્_12
આધારમધ્યાદાયાતા સુષુમ્નામાર્ગમ્ આશ્રિતા ।
ઉત્થાપનં સમાખ્યાતં બોધનં પરતસ્તથા ॥ સોમ્સ્વ્_13
કન્દસ્થો વેધયેન્ નાભિં તતો હૃત્સ્થં પિતામહમ્ ।
કણ્ઠસ્થમચ્યુતં સાક્ષાદ્રુદ્રં તાલુતલે સ્થિતમ્ ॥ સોમ્સ્વ્_14
ભ્રુવોર્મધ્યગતં ત્વ્ ઈશં બ્રહ્મદ્વારે સદાશિવમ્ ।
બોધયિત્વા વ્રજેદ્ આશુ પદં ચાનાશ્રિતં શિવમ્ ॥ સોમ્સ્વ્_15
એતદ્બોધનમ્ ઉદ્દિષ્ટં ચક્રવિશ્રામણં તતઃ ।
સ્વાભાવિકં દલં દીપ્તં દ્રવં સ્થિરનભોપમમ્ ॥ સોમ્સ્વ્_16
અમૃતં શેખરં ચૈવ શક્તિર્બ્રહ્મા તથૈવ ચ ।
બિન્દુનાદં તથા પ્રોક્તં ચક્રદ્વાદશકં કિલ ॥ સોમ્સ્વ્_17
વેધયન્તી ક્રમાચ્ છક્તિશ્ચક્રે ચક્રે પ્રતિક્ષણમ્ ।
વિશ્રમેત્ સા મહાદેવી ચક્રવિશ્રામ ઉત્તમઃ ॥ સોમ્સ્વ્_18
હૃદયં કમ્પતે પૂર્વં તાલુકદ્વારમેવ ચ ।
શિરશ્ચ ભ્રમતે તસ્ય દૃષ્ટિસંક્રાન્તિલક્ષણમ્ ॥ સોમ્સ્વ્_19
એકૈકં ભ્રમયત્ય્ અઙ્ગમ્ અઙ્ગપ્રત્યઙ્ગસંધિષુ ।
ઘૂર્ણતે હૃદયં ચાસ્ય સમ્યગ્વિદ્યાપ્રભાવતઃ ॥ સોમ્સ્વ્_20

યાનિ યાનિ વિકારાણિ અવસ્થા કુરુતે સતઃ ।
તેષુ તેષુ ન ભેતવ્યં ક્રીડતિ પરમેશ્વરી ॥ સોમ્સ્વ્_21
અમૃતે સેયમ્ ઉન્મત્તા વિકારાન્ કુરુતે બહૂન્ ।
મલત્રયવિકારૌ બહુજન્મસુ યત્કૃતમ્ ॥ સોમ્સ્વ્_22
ધુનોતિ સમલાન્ પાશાત્ પરશક્તિસમુત્થિતાન્ ।
ભૂમિકાગમનં પ્રોક્તમ્ અન્તાવસ્થા તથોચ્યતે ॥ સોમ્સ્વ્_23
યત્ સંક્રાન્તૌ રોમહર્ષો ઽસ્રુપાતો જૃમ્ભારમ્ભો ગદ્ગદા ગીર્ ગિરો ઽન્તઃ ।
ગ્રન્થિસ્ફોટઃ સ્પર્શદિવ્યપ્રહર્ષો બિન્દુસ્પન્દા નાભિકન્દાત્ સ્ફુરન્તિ ॥ સોમ્સ્વ્_24
અન્તાવસ્થા સમાખ્યાતા વિશ્રામસ્ ત્વ્ અધુનોચ્યતે ।
નાભિચક્રવિનિર્યાતા યદા શક્તિઃ પ્રબુધ્યતે ॥ સોમ્સ્વ્_25
તદા ત્વ્ અસ્તમિતં સર્વમક્ષગ્રામં બહિઃ સ્થિતમ્ ।
યદા સા પરમા શક્તિઃ સુલીના પરમે પદે ॥ સોમ્સ્વ્_26
તદા ન વિન્દતે કિંચિદ્ વિષયી વિષયાન્તરમ્ ।
શિવે વિશ્રામ્યતે શક્તિસ્તદા વિશ્રામ ઉચ્યતે ॥ સોમ્સ્વ્_27
યત્ર વિશ્રમણં શક્તેર્મનસ્તત્ર લયં વ્રજેત્ ।
તદાત્મા પરમાત્મત્વે જ્ઞાતવ્યો નિશ્ચિતાત્મભિઃ ॥ સોમ્સ્વ્_28
શિવીભૂતો ભવત્યાત્મા પરિણામઃ સ એવ હિ ।
સદા સ વર્ષતે દિવ્યમ્ અમૃતં જન્તુજીવનમ્ ॥ સોમ્સ્વ્_29
ચિત્તં તત્ર તુ સંધાર્ય પુનર્દૈવી વિશેત્તુ સા ।
તદા ત્વ્ આગમનં પ્રોક્તમેવં સમ્યક્ ત્રયોદશ ॥ સોમ્સ્વ્_30