રેવાખાણ્ડ (સંશોધિત પાઠ) · અધ્યાય 12

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે શ્રીનર્મદામાહાત્મ્યવર્ણનં નામ એકાદશોઽધ્યાયઃ ॥
ર્ક્વ્ અધ્યાય 12
શ્રીમાર્કણ્ડેય ઉવાચ:
એતચ્છ્રુત્વા વચો રાજન્સંહૃષ્ટા ઋષયો ઽભવન્ ।
નર્મદાં સ્તોતુમારબ્ધાઃ કૃતાઞ્જલિપુટા દ્વિજાઃ

નમો ઽસ્તુ તે પુણ્યજલે નમો મકરગામિનિ ।
નમસ્તે પાપમોચિન્યૈ નમો દેવિ વરાનને

નમો ઽસ્તુ તે પુણ્યજલાશ્રયે શુભે વિશુદ્ધસત્ત્વં સુરસિદ્ધસેવિતે ।
નમો ઽસ્તુ તે તીર્થગણૈર્નિષેવિતે નમો ઽસ્તુ રુદ્રાઙ્ગસમુદ્ભવે વરે

નમો ઽસ્તુ તે દેવિ સમુદ્રગામિનિ નમો ઽસ્તુ તે દેવિ વરપ્રદે શિવે ।
નમો ઽસ્તુ લોકદ્વયસૌખ્યદાયિનિ હ્યનેકભૂતૌઘસમાશ્રિતે ઽનઘે

સરિદ્વરે પાપહરે વિચિત્રિતે ગન્ધર્વયક્ષોરગસેવિતાઙ્ગે ।
સનાતનિ પ્રાણિગણાનુકમ્પિનિ મોક્ષપ્રદે દેવિ વિધેહિ શં નઃ

મહાગજૈર્ ઘમહિષૈર્ વરાહૈઃ સંસેવિતે દેવિ મહોર્મિમાલે ।
નતાઃ સ્મ સર્વે વરદે સુખપ્રદે વિમોચયાસ્માન્પશુપાશબન્ધાત્

પાપૈરનેકૈરશુભૈર્વિબદ્ધા ભ્રમન્તિ તાવન્નરકેષુ મર્ત્યાઃ ।
મહાનિલોદ્ભૂતતરઙ્ગભૂતં યાવત્તવામ્ભો હિ ન સંસ્પૃશન્તિ

અનેકદુઃખૌઘભયાર્દિતાનાં પાપૈરનેકૈરભિવેષ્ટિતાનામ્ ।
ગતિસ્ત્વમ્ અમ્ભોજસમાનવક્રે દ્વન્દ્વૈરનેકૈરપિ સંવૃતાનામ્

નદ્યશ્ચ પૂતા વિમલા ભવન્તિ ત્વાં દેવિ સમ્પ્રાપ્ય ન સંશયો ઽત્ર ।
દુઃખાતુરાણામ્ અભયં દદાસિ શિષ્ટૈરનેકૈરભિપૂજિતાસિ

સ્પૃષ્ટં કરૈશ્ચન્દ્રમસો રવેશ્ચ તદૈવ દદ્યાત્પરમં પદં તુ ।
યત્રોપલાઃ પુણ્યજલાપ્લુતાસ્તે શિવત્વમ્ આયાન્તિ કિમત્ર ચિત્રમ્

ભ્રમન્તિ તાવન્નરકેષુ મર્ત્યા દુઃખાતુરાઃ પાપપરીતદેહાઃ ।
મહાનિલોદ્ભૂતતરઙ્ગભઙ્ગં યાવત્તવામ્ભો ન હિ સંશ્રયન્તિ

મ્લેચ્છાઃ પુલિન્દાસ્ત્વથ યાતુધાનાઃ પિબન્તિ યે ઽમ્ભસ્તવ દેવિ પુણ્યમ્ ।
મુક્તા ભવન્તીહ ભયાત્તુ ઘોરાન્નિઃસંશયં તેઽપિ કિમત્ર ચિત્રમ્

સરાંસિ નદ્યઃ ક્ષયમભ્યુપેતા ઘોરે યુગે ઽસ્મિન્ હિ કલૌ પ્રદૂષિતે ।
ત્વં ભ્રાજસે દેવિ જલૌઘપૂર્ણા દિવીવ નક્ષત્રપથે ચ ગઙ્ગા

તવ પ્રસાદાદ્ વરદે વરિષ્ઠે કાલં યથેમં પરિપાલયિત્વા ।
યામો ઽથ રુદ્રં તવ સુપ્રસાદાદ્ વયં તથા ત્વં કુરુ વૈ પ્રસાદમ્

ગતિસ્ત્વમમ્બેવ પિતેવ પુત્રાંસ્ત્વં પાહિ નો યાવદિમં યુગાન્તમ્ ।
કાલં ત્વનાવૃષ્ટિહતં સુઘોરં યાવત્તરામસ્તવ સુપ્રસાદાત્

પઠન્તિ યે સ્તોત્રમિદં દ્વિજેન્દ્રાઃ શૃણ્વન્તિ યે ચાપિ નરાઃ પ્રશાન્તાઃ ।
તે યાન્તિ રુદ્રં વૃષસંયુતેન યાનેન દિવ્યામ્બરભૂષિતાશ્ચ

યે સ્તોત્રમેતત્ સતતં પઠન્તિ સ્નાત્વા તુ તોયે ખલુ નર્મદાયાઃ ।
અન્તે હિ તેષાં સરિદુત્તમેયં ગતિં વિશુદ્ધામ્ અચિરાદ્ દદાતિ

પ્રાતઃ સમુત્થાય તથા શયાનો યઃ કીર્તયેતાનુદિનં સ્તવં ચ ।
સ મુક્તપાપઃ સુવિશુદ્ધદેહઃ સમાશ્રયં યાતિ મહેશ્વરસ્ય