રામાયણ · અધ્યાય 3.037

એવમ્ અસ્મિ તદા મુક્તઃ કથં ચિત્ તેન સંયુગે
ઇદાનીમ્ અપિ યદ્ વૃત્તં તચ્ છૃણુષ્વ યદ્ ઉત્તરમ્

રાક્ષસાભ્યામ્ અહં દ્વાભ્યામ્ અનિર્વિણ્ણસ્ તથા કૃતઃ
સહિતો મૃગરૂપાભ્યાં પ્રવિષ્ટો દણ્ડકાવનમ્

દીપ્તજિહ્વો મહાકાયસ્ તીક્ષ્ણશૃણ્ગો મહાબલઃ
વ્યચરન્ દણ્ડકારણ્યં માંસભક્ષો મહામૃગઃ

અગ્નિહોત્રેષુ તીર્થેષુ ચૈત્યવૃક્ષેષુ રાવણ
અત્યન્તઘોરો વ્યચરંસ્ તાપસાંસ્ તાન્ પ્રધર્ષયન્

નિહત્ય દણ્ડકારણ્યે તાપસાન્ ધર્મચારિણઃ
રુધિરાણિ પિબંસ્ તેષાં તથા માંસાનિ ભક્ષયન્

ઋષિમાંસાશનઃ ક્રૂરસ્ ત્રાસયન્ વનગોચરાન્
તદા રુધિરમત્તો ઽહં વ્યચરં દણ્ડકાવનમ્

તદાહં દણ્ડકારણ્યે વિચરન્ ધર્મદૂષકઃ
આસાદયં તદા રામં તાપસં ધર્મમ્ આશ્રિતમ્

વૈદેહીં ચ મહાભાગાં લક્ષ્મણં ચ મહારથમ્
તાપસં નિયતાહારં સર્વભૂતહિતે રતમ્

સો ઽહં વનગતં રામં પરિભૂય મહાબલમ્
તાપસો ઽયમ્ ઇતિ જ્ઞાત્વા પૂર્વવૈરમ્ અનુસ્મરન્

અભ્યધાવં સુસંક્રુદ્ધસ્ તીક્ષ્ણશૃઙ્ગો મૃગાકૃતિઃ
જિઘાંસુર્ અકૃતપ્રજ્ઞસ્ તં પ્રહારમ્ અનુસ્મરન્

તેન મુક્તાસ્ ત્રયો બાણાઃ શિતાઃ શત્રુનિબર્હણાઃ
વિકૃષ્ય બલવચ્ ચાપં સુપર્ણાનિલતુલ્યગાઃ

તે બાણા વજ્રસંકાશાઃ સુઘોરા રક્તભોજનાઃ
આજગ્મુઃ સહિતાઃ સર્વે ત્રયઃ સંનતપર્વણઃ

પરાક્રમજ્ઞો રામસ્ય શઠો દૃષ્ટભયઃ પુરા
સમુત્ક્રાન્તસ્ તતો મુક્તસ્ તાવ્ ઉભૌ રાક્ષસૌ હતૌ

શરેણ મુક્તો રામસ્ય કથં ચિત્ પ્રાપ્ય જીવિતમ્
ઇહ પ્રવ્રાજિતો યુક્તસ્ તાપસો ઽહં સમાહિતઃ

વૃક્ષે વૃક્ષે હિ પશ્યામિ ચીરકૃષ્ણાજિનામ્બરમ્
ગૃહીતધનુષં રામં પાશહસ્તમ્ ઇવાન્તકમ્

અપિ રામસહસ્રાણિ ભીતઃ પશ્યામિ રાવણ
રામભૂતમ્ ઇદં સર્વમ્ અરણ્યં પ્રતિભાતિ મે

રામમ્ એવ હિ પશ્યામિ રહિતે રાક્ષસેશ્વર
દૃષ્ટ્વા સ્વપ્નગતં રામમ્ ઉદ્ભ્રમામિ વિચેતનઃ

રકારાદીનિ નામાનિ રામત્રસ્તસ્ય રાવણ
રત્નાનિ ચ રથાશ્ ચૈવ ત્રાસં સંજનયન્તિ મે

અહં તસ્ય પ્રભાવજ્ઞો ન યુદ્ધં તેન તે ક્ષમમ્
રણે રામેણ યુધ્યસ્વ ક્ષમાં વા કુરુ રાક્ષસ
ન તે રામકથા કાર્યા યદિ માં દ્રષ્ટુમ્ ઇચ્છસિ

ઇદં વચો બન્ધુહિતાર્થિના મયા યથોચ્યમાનં યદિ નાભિપત્સ્યસે
સબાન્ધવસ્ ત્યક્ષ્યસિ જીવિતં રણે હતો ઽદ્ય રામેણ શરૈર્ અજિહ્મગૈઃ