પ્રજ્ઞાપારમિતાસ્તોત્ર · શ્લોક 1-20

નિર્વિકલ્પે નમસ્ તુભ્યં પ્રજ્ઞાપારમિતે ઽમિતે
યા ત્વં સર્વાનવદ્યાઙ્ગિ નિરવદ્યૈર્ નિરીક્ષ્યસે ॥

આકાશમ્ ઇવ નિર્લેપાં નિષ્પ્રપઞ્ચાં નિરક્ષરામ્
યસ્ ત્વાં પશ્યતિ ભાવેન સ પશ્યતિ તથાગતમ્ ॥

તવ ચાર્યે ગુણાઢ્યાયા બુદ્ધસ્ય ચ જગદ્ગુરોઃ
ન પશ્યન્ત્ય્ અન્તરં સન્તશ્ ચન્દ્રચન્દ્રિકયોર્ ઇવ ॥

કૃપાત્મકાઃ પ્રપદ્ય ત્વાં બુદ્ધધર્મપુરઃસરીમ્
સુખેનાયાન્તિ માહાત્મ્યમ્ અતુલં ભક્તિવત્સલે ॥

સકૃદ્ અપ્ય્ આશયે શુદ્ધે યસ્ ત્વાં વિધિવદ્ ઈક્ષતે
તેનાપિ નિયતં સિદ્ધિઃ પ્રાપ્યતે ઽમોઘદર્શને ॥

સર્વેષામ્ અપિ વીરાણાં પરાર્થનિરતાત્મનામ્
પોષિકા જનયિત્રી ચ માતા ત્વમ્ અસિ વત્સલા ॥

યદ્ બુદ્ધા લોકગુરવઃ પુત્રાસ્ તવ કૃપાલવઃ
તેન ત્વમ્ અપિ કલ્યાણિ સર્વસત્ત્વપિતામહી ॥

સર્વપારમિતાભિસ્ ત્વં નિર્મલાભિર્ અનિન્દિતે
ચન્દ્રલેખેવ તારાભિર્ અનુયાતાસિ સર્વદા ॥

વિનેયં જનમ્ આસાદ્ય તત્ર તત્ર તથાગતૈઃ
બહુરૂપા ત્વમ્ એવૈકા નાનાનામભિર્ ઈડ્યસે ॥

પ્રભાં પ્રાપ્યેવ દીપ્તાંશોર્ અવશ્યાયોદબિન્દવઃ
ત્વાં પ્રાપ્ય પ્રલયં યાન્તિ દોષા વાદાશ્ ચ વાદિનામ્ ॥

ત્વમ્ એવ ત્રાસજનની બાલાનાં ભીમદર્શના
આશ્વાસજનની ચાસિ વિદુષાં સૌમ્યદર્શના ॥

યસ્ય ત્વય્ય્ અપ્ય્ અભિષ્વઙ્ગસ્ ત્વન્નાથસ્ય ન વિદ્યતે
તસ્યામ્બ કથમ્ અન્યત્ર રાગદ્વેષૌ ભવિષ્યતઃ ॥

નાગચ્છસિ કુતશ્ ચિત્ ત્વં ન ચ ક્વ ચન ગચ્છસિ
સ્થાનેષ્વ્ અપિ ચ સર્વેષુ વિદ્વદ્ભિર્ નોપલભ્યસે ॥

યે ત્વામ્ એવં ન પશ્યન્તિ પ્રપદ્યન્તે ચ ભાવતઃ
પ્રપદ્ય ચ વિમુચ્યન્તે તદ્ ઇદં મહદ્ અદ્ભુતમ્ ॥

ત્વામ્ એવ બધ્યતે પશ્યન્ન્ અપશ્યન્ન્ અપિ બધ્યતે
ત્વામ્ એવ મુચ્યતે પશ્યન્ન્ અપશ્યન્ન્ અપિ મુચ્યતે ॥

અહો વિસ્મયનીયાસિ ગમ્ભીરાસિ યશસ્વિનિ
સુદુર્બોધાસિ માયેવ દૃશ્યસે ન ચ દૃશ્યસે ॥

બુદ્ધૈઃ પ્રત્યેકબુદ્ધૈશ્ ચ શ્રાવકૈશ્ ચ નિષેવિતા
માર્ગસ્ ત્વમ્ એકા મોક્ષસ્ય નાસ્ત્ય્ અન્ય ઇતિ નિશ્ચયઃ ॥

વ્યવહારં પુરસ્કૃત્ય પ્રજ્ઞપ્ત્યર્થં શરીરિણામ્
કૃપયા લોકનાથૈસ્ ત્વમ્ ઉચ્યસે ચ ન ચોચ્યસે ॥

શક્તઃ કસ્ ત્વામ્ ઇહ સ્તોતું નિર્નિમિત્તાં નિરઞ્જનામ્
સર્વવાગ્વિશયાતીતાં યા ત્વં ક્વ ચિદ્ અનિશ્રિતા ॥

સત્ય્ એવમ્ અપિ સંવૃત્યા વાક્પથૈર્ વયમ્ ઈદૃશૈઃ
ત્વામ્ અસ્તુત્યામ્ અપિ સતીં તુષ્ટૂષન્તઃ સુનિર્વૃતાઃ ॥