પૈપ્પલાદ-સંહિતા · અધ્યાય 9.10

જીવાતવે ન મર્તવે
શિરસ્ ત આ રભામહે ।
રસં વિષસ્ય નાવિદમ્
ઉદ્નઃ ફેનમ્ અદન્ન્ ઇવ ॥

ભૂમ્યા મધ્યાદ્ દિવો મધ્યાદ્
ભૂમ્યા અન્તાદ્ અથો દિવઃ ।
મધ્યે પૃથિવ્યા યદ્ વિષં
તદ્ વાચા દૂષયામસિ ॥

અશ્વત્થે નિહિતં વિષં
કપાલે નિહિતં વિષમ્ ।
શિલાયા જજ્ઞે તૈમાતઃ
પ્રથમો વિષદૂષણી ॥

વિષસ્યાહં વૈન્દકસ્ય
વિષસ્ય દાર્વ્યસ્ય ચ ।
અથો વિષસ્ય સ્વૈત્નસ્ય
સમાનીં વાચમ્ અગ્રભમ્ ॥

તદ્ ઇદ્ વદન્ત્ય્ અર્થિન
ઉત શૂદ્રા ઉતાર્યાઃ ।
વિષાણાં વિષ્વગર્થાનાં
સર્વથૈવારસં વિષમ્ ॥

પરુષસ્ ત્વામૃતકર્ણો
વિષ પ્રથમમ્ આવયત્ ।
યથા હ તં નારોપયસ્
તથાસ્ય્ અરસં વિષમ્ ॥

યદ્ વો દેવા ઉપજીકા
ઉદ્દેહં શુષિરં દદુઃ ।
તત્રામૃતસ્યાસિક્તં
તચ્ ચકારારસં વિષમ્ ॥

શકુન્તિકા મે અબ્રવીદ્
વિષપુષ્પં ધયન્તિકા ।
ન રોપયતિ ન માદયત્ય્
અરસં શાર્વીયં વિષમ્ ॥

અત્ય્ અપપ્તામ દુર્ગાણિ
શારીઃ શકુનયો યથા ।
ઇહેન્દ્રાણીં વરુણાનીં
સિનીવાલીં ક્રકોઢ્યામ્ ।
ગ્રાહાં શૂરપુત્રાં દેવીં
યાચામો વિષદૂષણમ્ ॥

આલકં વ્યાલકં વ્ય્ આવં
જાલ્મ જીગીમહે ।
જરદ્વિષં યુવાભિષગ્
વયમ્ ઇત્ સાસહામહૈ ॥

અસ્થાદ્ દ્યૌર્ અસ્થાત્ પૃથિવ્ય્
અસ્થાદ્ વિશ્વમ્ ઇદં જગત્ ।
અસ્થુર્ વિષસ્યારોપયો
ઽનડ્વાહઃ ક્રિશા ઇવ ॥

યાવત્ સૂર્યો વિતપતિ
યાવચ્ ચાભિવિપશ્યતિ ।
તેનાહમ્ ઇન્દ્રદત્તેન
કૃણોમ્ય્ અરસં વિષમ્ ।
તદ્ વિષમ્ અરસં વિષમ્
અધોભાગ્ અરસં વિષમ્ ॥