પૈપ્પલાદ-સંહિતા · અધ્યાય 5.13

શિવઃ શિવાભિર્ વયસ્વન્
સં ગચ્છસ્વ તન્વા જાતવેદઃ ।
રત્નં દધાનઃ સુમનાઃ પુરસ્તાદ્
ગૃહેભ્યસ્ ત્વા વર્ચસે નિર્ વપામિ ॥

પૃથિવ્યાં ઘર્મ સ્તભિતો
ઽન્તરિક્ષે દિવિ શ્રિતઃ ।
દ્યૌર્ એનં સર્વતઃ પાતુ
યસ્ ત્વા પચત્ય્ ઓદન ॥

યે સમુદ્રમ્ ઐરયન્ યે ચ સિન્ધું
યે ઽન્તરિક્ષં પૃથિવીમ્ ઉત દ્યામ્ ।
યે વાતેન સરથં યાન્તિ દેવાસ્
તાન્ આપ્નોત્ય્ ઓદનપાકો અત્ર ॥

ઋચા કુમ્ભ્ય્ અધિહિતા
સામ્ના પચ્યત ઓદનઃ ।
અંશું સોમસ્યૈતં મન્યે
વૈશ્વદેવમ્ ઇદં હવિઃ ॥

ઉલૂખલે મુસલે યે ચ શૂર્પે
ભૂમ્યામ્ ઉખાયાં યદ્ ઇવાસસઞ્જ ।
યા વિપ્રુષો યાનિ નિર્ણેજનાનિ
સર્વં તત્ તે બ્રહ્મણા પૂરયામિ ॥

ઊર્ધ્વઃ પ્રેહિ મા સં વિક્થા
વ્ય્ અસ્ય રજો અન્તરમ્ ।
રક્ષાંસિ સર્વા તીર્ત્વા-
-અથા રોહ દિવં ત્વમ્ ॥

તુરો નો અતુરો ભવ
સં ધીભિર્ ધીયતામ્ અયમ્ ।
સં પૃથિવ્યા સમ્ અગ્નિના
સં સૂર્યસ્ય રશ્મિભિઃ
સં દેવાનામ્ અપસ્યયા ॥

આજદ્દ્વિષઃ સુકૃતસ્ય લોકે
તૃતીયે નાકે અધિ રોચને દિવઃ ।
મૃત્યોઃ પદં યોપયન્તો ન્વ્ એત
પશ્ચા નિકૃત્ય મૃત્યું પદયોપનેન ॥