પૈપ્પલાદ-સંહિતા · અધ્યાય 3.32

પ્રજાપતેર્ જાયમાનાઃ
પ્રજા જાતાશ્ ચ યા ઇમાઃ ।
તા અસ્મૈ પ્રતિ વેદય
ચિકિત્વાઁ અનુ મન્યતામ્ ॥

યેષામ્ ઈશે પશુપતિઃ પશૂનાં
ચતુષ્પદામ્ ઉત વા યે દ્વિપાદઃ ।
નિષ્ક્રીતાસ્ તે યજ્ઞિયા યન્તિ લોકં
રાયસ્પોષાય યજમાનં સચન્તામ્ ॥

પ્રમુઞ્ચન્તો ભુવનસ્ય ગોપા
ગાતું દેવા યજમાનાય ધત્ત ।
ઉપાકૃતં શશમાનં યદ્ અસ્થાત્
પ્રિયં દેવાનામ્ અપ્ય્ એતુ પાથઃ ॥

યે બધ્યમાનમ્ અનુ દીધ્યાના
અન્વૈક્ષન્ત મનસા ચક્ષુષા ચ ।
અગ્નિષ્ ટાન્ અગ્રે પ્ર મુમુક્ત દેવઃ
પ્રજાપતિઃ પ્રજયા સંવિદાનઃ ॥

યેષાં પ્રાણા અન્વબધ્નન્ત બદ્વં
ગવાં પશૂનામ્ ઉત પૂરુષાણામ્ ।
ઇન્દ્રસ્ તાન્ અગ્રે પ્ર મુમુક્ત દેવઃ
પ્રજાપતિઃ પ્રજયા સંવિદાનઃ ॥

ય આરણ્યાઃ પશવો વિશ્વરૂપા
યે વિશ્વરૂપા ઉતૈકરૂપાઃ ।
વાયુષ્ ટાન્ અગ્રે પ્ર મુમુક્ત દેવઃ
પ્રજાપતિઃ પ્રજયા સંવિદાનઃ ॥

પ્રજાનન્તઃ પ્રતિ ગૃહ્ણન્તુ દેવાઃ
પ્રાણમ્ અઙ્ગેભ્યસ્ પર્યાચરન્તમ્ ।
દ્યાં ગચ્છ પ્રતિ તિષ્ઠા શરીરૈઃ
સ્વર્ગં યાહિ પથિભિઃ શિવેભિઃ ॥