પૈપ્પલાદ-સંહિતા · અધ્યાય 18.28

સ પ્રાચીં દિશમ્ અનુ વ્ય્ અચલત્ ।
તં બૃહચ્ ચ રથન્તરં ચ વિશ્વે ચ દેવા આદિત્યાશ્ ચાનુ વ્ય્ અચલન્ ।
બૃહતશ્ ચ વૈ સ રથન્તરસ્ય ચ વિશ્વેષાં ચ દેવાનામ્
આદિત્યાનાં ચ પ્રિયં ધામ ભવતિ ય એવં વેદ ।
બૃહતે ચ વૈ સ રથન્તરાય ચ વિશ્વેભ્યશ્ ચ દેવેભ્ય આદિત્યેભ્યશ્ ચ-
-આ વૃશ્ચતે ય એવં વિદ્વાંસં વ્રાત્યમ્ ઉપવદતિ ॥

તસ્ય પ્રાચ્યાં દિશિ ।
શ્રદ્ધા પૂંશ્ચલી મિત્રો માગધો વિજ્ઞાનં
વાસો ઽહર્ ઉષ્ણીષં રાત્રી કેશા હરિતૌ પ્રવર્તૌ કલ્મલિર્ મણિઃ ।
ભૂતં ચ ભવ્યં ચ પરિષ્કન્દૌ મનો વિપથં માતરિશ્વા
પવમાનશ્ ચ વિપથવાહૌ વાતઃ સારથી રેષ્મા પ્રતોદઃ
કીર્તિશ્ ચ યશશ્ ચ પુરઃસરાવ્ ઐનં કીર્તિર્ ગચ્છત્ય્
ઐનં યશો ગચ્છતિ ય એવં વેદ ॥

સ દક્ષિણાં દિશમ્ અનુ વ્ય્ અચલત્ ।
તં યજ્ઞાયાયજ્ઞિયં ચ વામદેવ્યં ચ યજ્ઞશ્ ચ પશવશ્ ચાનુ વ્ય્ અચલન્ ।
યજ્ઞાયાયજ્ઞિયસ્ય ચ વૈ સ વામદેવ્યસ્ય ચ યજ્ઞસ્ય ચ પશુનાં ચ (…) ।
યજ્ઞાયાયજ્ઞિયાય ચ વૈ સ વામદેવ્યાય ચ યજ્ઞાય ચ પશુભ્યશ્ ચ (…) ॥

તસ્ય દક્ષિણાયાં દિશિ ।
ઊષાઃ પૂંશ્ચલી મન્ત્રો માગધો (…) ।
અહો રાત્રી ચ પરિષ્કન્દૌ (…) ॥

સ પ્રતીચીં દિશં (અનુ વ્ય્ અચલત્) ।
તં વૈરૂપં ચ વૈરાજં ચ વરુણશ્ ચ રાજા પશ્ચાનુ વ્ય્ અચલન્ ।
વૈરૂપસ્ય ચ વૈ સ વૈરાજસ્ય ચ વરુણસ્ય ચ રાજ્ઞો અપાં ચ (…) ।
વૈરૂપાય ચ વૈ સ વૈરાજાય ચ વરુણાય ચ રાજ્ઞેદ્ભ્યશ્ ચ (…) ॥

તસ્ય પ્રતીચ્યાં દિશિ ।
ઇરાઃ પુંશ્ચલી હસો માગધો (…) ।
પૌર્ણમાસી ચામાવાસ્યા ચ પરિષ્કન્દૌ (…) ॥

સ ઉદીચીં દિશમ્ અનુ વ્ય્ અચલત્ ।
તં શ્યૈતં ચ નૌધસં ચ સોમશ્ ચ રાજા સપ્ત ઋષયશ્ ચાનુ વ્ય્ અચલન્ ।
શ્યૈતસ્ય ચ વૈ સ નૌધસસ્ય ચ સોમસ્ય ચ રાજ્ઞઃ
સપ્ત ઋષીનાં ચ પ્રિયં ધામ ભવતિ ય (એવં વેદ) ।
શ્યૈતાય ચ વૈ સ નૌધાસાય ચ સોમાય ચ રાજ્ઞઃ
સપ્ત ઋષિભ્યશ્ ચા વૃશ્ચતે ય એવં વિદ્વાંસં વ્રાત્યમ્ ઉપવદતિ ॥

તસ્યોદીચ્યાં દિશિ ।
વિદ્યુત્ પુંશ્ચલી સ્તનયિત્નુર્ માગધો વિજ્ઞાનં વાસો ઽહર્ ઉષ્ણીષં રાત્રી
કેશા હરિતૌ પ્રવર્તૌ કલ્મલિર્ મણિઃ ।
શ્રુતં ચ વિશ્રુતં ચ પરિષ્કન્દૌ મનો વિપથં
માતરિશ્વા ચ પવમાનશ્ ચ વિપથવાહૌ
વાતઃ સારથી રેષ્મા પ્રતોદઃ કીર્તિશ્ ચ યશશ્ ચ પુરઃસરાવ્
ઐનં કીર્તિર્ ગચ્છત્ય્ ઐનં યશો ગચ્છતિ ય (એવં વેદ) ॥