પૈપ્પલાદ-સંહિતા · અધ્યાય 11.16

ઊર્ધ્વશ્રિતો વૈ નામૈતા આપો યદ્ ઓષધયશ્ ચ વનસ્પતયશ્ ચ
તાસામ્ અગ્નિર્ અધિપતિઃ ।
યો વા એતા ઊર્ધ્વશ્રિત આપો વેદાગ્નિમ્ અધિપતિમ્ ।
યથૈતમ્ એતા ઊર્ધ્વા ઉપતિષ્ઠન્ત્ય્
એવૈનમ્ ઊર્ધ્વા ઉપ તિષ્ઠન્ત્ય્
અધિપતિર્ ભવતિ સ્વાનાં ચાન્યેષાં ચ ય એવં વેદ ॥

પ્રસ્કદ્વરીર્ વૈ નામૈતા આપો યત્ પૃષ્વાસ્
તાસામ્ આદિત્યો ઽધિપતિઃ ।
યો વા એતાઃ પ્રસ્કદ્વરીર્ આપો વેદાદિત્યમ્ અધિપતિમ્ ।
યથૈતા એતસ્મિન્ન્ ઉદ્યતિ પ્રસ્કન્દન્ત્ય્
એવાસ્મિન્ન્ આ યતિ પ્રસ્કન્દન્ત્ય્
અધિપતિઃ (…) ॥

તક્વરીર્ વૈ નામૈતા આપો યાઃ સૂદય
તાસાં પૃથિવ્ય્ અધિપત્ની ।
યો વા એતાસ્ તક્વરીર્ આપો વેદ પૃથિવીમ્ અધિપત્નીમ્ ।
યથૈતા એતસ્યાં પ્રણુતાસ્ તકન્તીર્ યન્ત્ય્
એવૈનેન દ્વિષન્તઃ પ્રણુતા યન્ત્ય્
અધિપતિઃ (…) ॥

વશિનીર્ વૈ નામૈતા આપો યાઃ સ્યન્દન્તે
તાસાં વરુણો ઽધિપતિઃ ।
યો વા એતા વશિનીર્ આપો વેદ વરુણમ્ અધિપતિમ્ ।
યથૈતમ્ એતાસાં સ્યન્દમાનાનાં વશમ્ આદત્ત
એવા દ્વિષતાં વશમ્ આ દત્તે
ઽધિપતિઃ (…) ॥

ઊર્જો વૈ નામૈતા આપો યદ્ ગાવસ્
તાસાં ત્વષ્ટાધિપતિઃ ।
યો વા એતા ઊર્જ આપો વેદ ત્વષ્ટારમ્ અધિપતિમ્ ।
ઊર્જસ્વી તેજસ્વી ભવતિ
પ્ર સાહસ્રાન્ પશૂન્ આપ્નોત્ય્
અધિપતિર્ ભવતિ (…) ॥

વર્ચો વૈ નામૈતા આપો યદ્ ઘૃતં
તાસાં પૂષા અધિપતિઃ ।
યો વા એતા વર્ચ આપો વેદ પૂષણમ્ અધિપતિમ્ ।
વર્ચસ્વી તેજસ્વી ભવત્ય્
ઉતાસ્યાનભ્યક્તસ્ય મુખં રોચતે
ઽધિપતિઃ (…) ॥

ઓજો વૈ નામૈતા આપો યન્ મધુ
તાસામ્ ઇન્દ્રો ઽધિપતિઃ ।
યો વા એતા ઓજ આપો વેદેન્દ્રમ્ અધિપતિમ્ ।
ઓજસ્વી વીર્યાવાન્ ઇન્દ્રિયાવી ભવતિ
પ્ર રાજસભાયાં મધુપર્કમ્ આપ્નોત્ય્
અધિપતિઃ (…) ॥

ઉગ્રા વૈ નામૈતા આપો યદ્ ધ્રાદુનયસ્
તાસાં મરુતો અધિપતયઃ ।
યો વા એતા ઉગ્રા આપો વેદ મરુતો ઽધિપતીન્ ।
ઉગ્રો બલવાન ભવતિ
મારુતં શર્ધ ઇત્ય્ એનમ્ આહુર્
અધિપતિઃ (…) ॥

મહો વૈ નામૈતા આપો યદ્ વર્ષં
તાસાં પર્જન્યો ઽધિપતિઃ ।
યો વા એતા મહ આપો વેદ પર્જન્યમ્ અધિપતિમ્ ।
મહસ્વી મિત્રબાહો ભવત્ય્
ઉતૈનેન સ્વા નન્દન્ત્ય્ અસ્માકમ્ અયમ્ ઇતિ
તસ્માત્ સર્વો વૃષ્ટે મહીયતે
ઽધિપતિઃ (…) ॥

અતિમન્યા વૈ નામૈતા આપો યત્ સુરા
તસામ્ અશ્વિનાધિપતી ।
યો વા એતા અતિમન્યા આપો વેદાશ્વિનાધિપતી ।
અતિ મન્યતે ભ્રાતૃવ્યાન્ નૈનં ભ્રાતૃવ્યા અતિ મન્યન્તે
તસ્માન્ મત્તો મત્તમ્ અતિ મન્યતે
ઽધિપતિઃ (…) ॥

પરિચિતો વૈ નામૈતા આપો યાઃ કર્ષ્વાં
તાસાં યમો ઽધિપતિઃ ।
યો વા એતાઃ પરિચિત આપો વેદ યમમ્ અધિપતિમ્ ।
પર્ય્ એનં સ્વાશ્ ચ વિશ્યાશ્ ચાવશ્યન્ત્ય્
અધિપતિઃ (…) ॥

રન્તયો વૈ નામૈતા આપો ય સ્ત્રિયસ્
તાસાં કામો ઽધિપતિઃ ।
યો વા એતા રન્તીર્ આપો વેદ કામમ્ અધિપતિમ્ ।
રમન્તે અસ્મિન્ રમણીયો ભવતિ કામ ઇવ સ્ત્રીણામ્
અધિપતિઃ (…) ॥

વિશ્વભૃતો વૈ નામૈતા આપો યત્ પુરુષસ્
તાસાં મૃત્યુર્ અધિપતિઃ ।
યો વા એતા વિશ્વભૃત આપો વેદ મૃત્યુમ્ અધિપતિમ્ ।
વિશ્વસ્ય ભર્તા ભવતિ વિશ્વમ્ એનં બિભર્ત્ય્
આસ્ય ત્રયો ઽગ્નયો ગૃહે ધીયન્તે દક્ષિણાગ્નિર્ ગાર્હપત્ય આહવનીયઃ ।
ઐનં ચત્વારિ વામાનિ ગચ્છન્તિ નિષ્કઃ કંસો ઽશ્વતરો હસ્ત્ય્
અધિપતિઃ (…) ॥

તાસાં વા એતાસામ્ અપાં હિમવાન્ ઊધઃ સોમો વત્સઃ પરમેષ્ઠ્ય્ અધિપતિઃ ।
યો વા એતાસામ્ અપાં હિમવન્તમ્ ઊધઃ સોમં વત્સં પરમેષ્ઠિનમ્ અધિપતિં વેદ ।
પરમેષ્ઠી ભવતિ ગચ્છતિ પરમેષ્ઠિતામ્
અધિપતિર્ ભવતિ સ્વાનાં ચાન્યેષાં ચ ય એવં વેદ ॥