પૈપ્પલાદ-સંહિતા · અધ્યાય 10.11

યો નઃ સ્વો યો અરણો
ભ્રાતૃવ્યશ્ ચ જિઘાંસતિ ।
ઇન્દ્રશ્ ચ તસ્યાગ્નિશ્ ચ
મર્મ સ્કન્ધેષુ વિન્દતામ્ ॥

યો મા શયાનં જાગ્રતં
યશ્ ચ સુપ્તં જિઘાંસતિ ।
ઇન્દ્રશ્ ચ તસ્યાગ્નિશ્ ચ
બાહૂ મર્મણિ વૃશ્ચતામ્ ॥

યો મા ચરન્તં તિષ્ઠન્તમ્
આસીનં ચ જિઘાંસતિ ।
ઇન્દ્રશ્ ચ તસ્મિન્ન્ અગ્નિશ્ ચ
દુરિતં પ્રતિ મુઞ્ચતામ્ ॥

યો મા ચક્ષુષા મનસા
યશ્ ચ વાચા જિઘાંસતિ ।
ઇન્દ્રશ્ ચ તસ્મા અગ્નિશ્ ચ-
-એનાંસિ વહતામ્ ઇતઃ ॥

યઃ પિશાચો યાતુધાનઃ
ક્રવ્યાદ્ યો મા જિઘાંસતિ ।
ઇન્દ્રશ્ ચ તસ્યાગ્નિશ્ ચ
મૂર્ધાનં પ્રતિ વિધ્યતામ્ ॥

યો મા બ્રહ્મણા તપસા
યશ્ ચ યજ્ઞૈર્ જિઘાંસતિ ।
ઇન્દ્રશ્ ચ તસ્યાગ્નિશ્ ચ
હૃદયે ઽધિ નિ વિધ્યતામ્ ॥

યો મે બ્રહ્મ યો મે તપો
બલં શ્રેષ્ઠં જિઘાંસતિ ।
ઇન્દ્રશ્ ચ તસ્મા અગ્નિશ્ ચ
ક્રુદ્ધૌ દિગ્ધાભિર્ અસ્યતામ્ ॥

યો મે અન્નં યો મે રસં
વાચં શ્રેષ્ઠાં જિઘાંસતિ ।
ઇન્દ્રશ્ ચ તસ્મા અગ્નિશ્ ચ-
-આચ્છમ્બટ્કારમ્ અસ્યતામ્ ॥

યો મે તન્તું યો મે પ્રજાં
ચક્ષુઃ શ્રોત્રં જિઘાંસતિ ।
ઇન્દ્રશ્ ચ તસ્મા અગ્નિશ્ ચ
હેતિં દેવેષુ વિન્દતામ્ ॥

યો મે ગોભ્ય ઇરસ્યત્ય્
અશ્વેભ્યઃ પુરુષેભ્યઃ ।
ઇન્દ્રશ્ ચ તસ્મા અગ્નિશ્ ચ
જ્યાનિં દેવેષુ વિન્દતામ્ ॥