નર્મદાષ્ટકમ્ · અધ્યાય 1

શ્રીમદાદ્ય-શંકરાચાર્ય-વિરચિત-નર્મદાષ્ટકમ્ ।
સબિન્દુસિન્ધુસુસ્ખલત્તરઙ્ગભઙ્ગરઞ્જિતં
દ્વિષત્સુપાપજાતજાતકારિવારિસંયુતમ્।
કૃતાન્તદૂતકાલભૂતભીતિહારિવર્મદે
ત્વદીયપાદપઙ્કજં નમામિ દેવિ નર્મદે

ત્વદમ્બુલીનદીનમીનદિવ્યસમ્પ્રદાયકં
કલૌમલૌઘભારહારિસર્વતીર્થનાયકમ્।
સુમચ્છકચ્છનક્રચક્રચક્રવાકશર્મદે
ત્વદીયપાદપઙ્કજં નમામિ દેવિ નર્મદે

મહાગભીરનીરપૂરપાપધૂતભૂતલં
નમત્સમસ્તપાતકારિદારિતાપદાચલમ્।
જગલ્લયે મહાભયે મૃકણ્ડુસૂનુહર્મ્યદે
ત્વદીયપાદપઙ્કજં નમામિ દેવિ નર્મદે

ગતં તદૈવ મે ભયં ત્વદમ્બુ વીક્ષિતં યદા
મૃકણ્ડુસૂનુશૌનકાસુરારિસેવિસર્વદા।
પુનર્ભવાબ્ધિજન્મજં ભવાબ્ધિદુઃખવર્મદે
ત્વદીયપાદપઙ્કજં નમામિ દેવિ નર્મદે

અલક્ષલક્ષકિન્નરામરાસુરાદિપૂજિતં
સુલક્ષનીરતીરધીરપક્ષિલક્ષકૂજિતમ્।
વસિષ્ઠશિષ્ટપિપ્પલાદકર્દમાદિશર્મદે
ત્વદીયપાદપઙ્કજં નમામિ દેવિ નર્મદે

સનત્કુમારનાચિકેતકશ્યપાત્રિષટ્પદૈઃ
ધૃતં સ્વકીયમાનસેષુ નારદાદિષટ્પદૈઃ।
રવીન્દુરન્તિદેવદેવરાજકર્મશર્મદે
ત્વદીયપાદપઙ્કજં નમામિ દેવિ નર્મદે

અલક્ષલક્ષલક્ષપાપલક્ષસારસાયુધં
તતસ્તુ જીવજન્તુતન્તુ ભુક્તિમુક્તિદાયકમ્।
વિરિઞ્ચિવિષ્ણુશંકરસ્વકીયધામવર્મદે
ત્વદીયપાદપઙ્કજં નમામિ દેવિ નર્મદે

અહોઽમૃતં સ્વનં શ્રુતં મહેશકેશજાતટે
કિરાતસૂતવાડબેષુ પણ્ડિતે શઠે નટે।
દુરન્તપાપતાપહારિસર્વજન્તુશર્મદે
ત્વદીયપાદપઙ્કજં નમામિ દેવિ નર્મદે

ઇદં તુ નર્મદાષ્ટકં ત્રિકાલમેવ યે સદા
પઠન્તિ તે નિરન્તરં ન યાન્તિ દુર્ગતિં કદા।
સુલભ્યદેહદુર્લભં મહેશધામગૌરવં
પુનર્ભવા નરા ન વૈ વિલોકયન્તિ રૌરવમ્

ઇતિ શ્રીમદ્ આદ્યશંકરાચાર્યવિરચિતં નર્મદાષ્ટકં સમ્પૂર્ણમ્ ।નર્મદે હર । નર્મદે હર । નર્મદે હર ॥